Fjármálaráðuneytið hefur enn ekki tekið ákvörðun um til hvaða aðgerða verði gripið í styrkjamálinu svokallaða. Nokkrir stjórnmálaflokkar hafa fengið milljónastyrki úr ríkissjóði án þess að uppfylla skilyrði gildandi laga.
Forsætisráðherra Danmerkur er á yfirreið um Evrópu til að stilla saman strengi með bandamönnum í NATÓ. Grænlandsdeilan við Bandaríkjaforseta er ekki yfirskrift fundanna, en er augljóslega það sem vakir fyrir henni.
Hafrannsóknastofnun býst ekki við að loðnumælingar, sem lauk um helgina, breyti fyrri ráðgjöf um engar veiðar í vetur. Tvö fiskiskip fóru í gærkvöld í leiðangur til frekari loðnumælinga undan Austfjörðum.
Ekki er ljóst hvort og hvernig lögregla nýtir gögn, sem tálbeituhópur ungmenna safnaði um meinta barnaníðinga. Lögregla hefur áhyggjur af að fólk taki lögin í eigin hendur.
Kostnaður upp á hundruð milljarða blasir við íslenskum sveitarfélögum, vegna hertra reglna Evrópusambandsins um losun á skólpi í sjó. Íslensk stjórnvöld reyna að semja um undanþágu.
Sex snjóflóð féllu yfir veginn um Kleifaheiði milli Patreksfjarðar og Barðastrandar í gærkvöldi. Eitt þeirra féll rétt á hæla snjóflóðaeftirlitsmanns.
Sögulegt hrun varð á bandarískum hlutabréfamarkaði í gær eftir að kínverskt gervigreindarforrit spratt fram á sjónarsviðið. Hingað til hafa Bandaríkjamenn þótt leiða þennan geira, en ljóst er að gervigreindarkapphlaupið er hafið af alvöru.
Ísland keppir á fyrra undanúrslitakvöldi Eurovision í ár, þriðjudaginn 13. maí.
