Formaður VR gefur lítið fyrir orð formanns Sjálfstæðisflokksins um að útgjöld vegna Grindavíkur geti haft áhrif á aðkomu stjórnvalda að gerð kjarasamninga. Hann segir ósmekklegt og ógeðfellt af formanninum að nota stöðuna í Grindavík til að vinna gegn kjarasamningum.
Þensla á húsnæðismarkaði eykst líklega næstu mánuði vegna aðgerða ríkisstjórnarinnar til að mæta vanda Grindvíkinga. Þetta segir fjármálaráðherra. Innviðaráðherra segir til skoðunar að taka út eða endurmeta vægi húsnæðis í verðbólgumælingum.
Bandaríkjamenn og Bretar gerðu sameiginlega árás á Húta í Jemen í annað sinn í nótt. Utanríkisráðherra Breta segir að ríkin vilji senda skýr skilaboð um að orðum þeirra fylgi aðgerðir.
Innan við þriðjungur landsmanna myndi kjósa stjórnarflokkana ef gengið yrði til kosninga nú samkvæmt nýrri könnun Maskínu. Sjálfstæðisflokkurinn hefur ekki áður mælst með jafn lítið fylgi.
Umsókn Svía að Atlantshafsbandalaginu verður að líkindum afgreidd á tyrkneska þinginu í þessari viku, jafnvel í dag, segja þarlendir fjölmiðlar. Ungverjar, sem einnig eiga eftir að samþykkja umsókn Svía, hafa boðið forsætisráðherra Svíþjóðar í heimsókn til að ræða málið
Heimilislæknar verða ekki orðnir nógu margir fyrr en í fyrsta lagi eftir tíu ár. Landsmönnum fjölgar hraðar en búist var við og margir læknar hætta heimilislækningum vegna aldurs á næstu fimm árum.
Rússneski stjórnarandstæðingurinn Alexei Navalny þarf að hlusta á lag með rússneskri poppstjörnu, sem er hliðholl Pútín Rússlandsforseta, klukkan fimm á hverjum morgni í fangelsinu sem hann var fluttur í nýverið.
Veikindi, leikbann og meiðsli hrjá íslensku handboltalandsliðsmennina í Þýskalandi. Þeir mæta Austurríki í lokaleik milliriðlakeppninnar á EM á morgun og þurfa fimm marka sigur til að komast í undankeppni Ólympíuleikanna.
