Óvissustigi verður ekki aflétt og búast má við því að vegum á Vestfjörðum verði lokað aftur í kvöld vegna ofankomu. Á Norðurlandi sinntu björgunarsveitir fjölda útkalla vegna foktjóna.
Fínn leir ofan af hálendi smaug inn um glugga á Héraði í sterkri vestanátt í nótt og sundlaugarbotninn á Egilsstöðum var svartur af drullu í morgun.
Vaxtagreiðslur ríkissjóðs aukast um fjórtán og hálfan milljarð í ár samkvæmt fjáraukalögum. Hálfur milljarður fer í kostnað vegna komandi alþingiskosninga.
Hátt í níutíu prósent félaga í verkalýðsfélaginu Hlíf í Hafnarfirði hafa samþykkt verkfallsaðgerðir á leikskólum í næstu viku. Allsherjarverkfall gæti skollið á níunda desember.
Kjarasamningar síðustu ára hafa dregið úr bili milli tekjuhárra og tekjulágra. Hagstofustjóri segir þetta spretta af áherslu á krónutöluhækkanir.
Donald Trump hefur tilkynnt að milljarðamæringurinn Elon Musk fari fyrir nýju ráðuneyti sem á að hagræða í opinberum útgjöldum.
Barnaverndartilkynningum í Mosfellsbæ fjölgar um 50 prósent á milli ára og ætlar bærinn að verja hundrað milljónum aukalega í forvarnarstarf.
Bandarísk yfirvöld segja að Ísrael hafi staðið við skilmála sem settir voru um aukna neyðaraðstoð á Gaza en bandalag hjálparsamtaka fullyrðir að Ísrael hafi ekki staðið við neitt.
Svipað hlutfall karla og kvenna er í framboði fyrir kosningarnar 30. nóvember, Það er þó misjafnt eftir flokkum - hjá einum flokki eru konur um fjórðungur frambjóðenda í tíu efstu sætunum.
Þjálfari landsliðs kvenna í handbolta, gerir aðra tilraun í dag til að kynna leikmannahóp Íslands fyrir Evrópumótið sem hefst í lok mánaðarins.
