Kína kynnti í morgun áttatíu og fjögurra prósenta tolla á vörur frá Bandaríkjunum sem svar við hundrað og fjögurra prósenta tollum á Kína sem taka gildi í dag.
Forsætisráðherra hittir leiðtoga Evrópusambandsins síðdegis, til að ræða um tollaog tilraunir Íslands og annarra EES-ríkja til að komast hjá mótaðgerðum ESB við tollahækkunum Bandaríkjastjórnar.
Ný líkön Veðurstofunnar benda til þess að rýma þurfi færri bæi á hættusvæðum nærri Bárðarbungu en áður var talið. Í dag verður íbúafundur í Þingeyjarsveit til að rifja upp viðbrögð við eldgosum og jökulhlaupum.
Sérfræðingur í stjórnsýslurétti segir enn margt á huldu um af hverju fyrrverandi forsætisráðherra taldi sig vanhæfan til að afgreiða umsókn um hvalveiðileyfi í fyrra og skipti svo um skoðun. Það komi fyrir að ráðherrar lýsi sig vanhæfa án þess að vanhæfi sé til staðar.
Sundabraut, Ölfusárbrú og Vaðlaheiðargöng eru meðal samgöngumannvirkja sem kæmi til greina að setja í innviðafélag á vegum ríkisins. Samgönguráðherra segir nauðsynlegt að breyta hugarfari við fjármögnun samgönguinnviða.
Laun kjörinna fulltrúa í Kópavogi verða lækkuð og laun æðstu stjórnenda fryst til ársloka í 670 milljóna króna hagræðingaraðgerðum sem samþykktar voru gær. Minnihluti bæjarins telur umhugsunarvert að laun bæjarstjórans lækki ekki nema að hluta.
Gjaldtaka hefst við lundabyggðina í Hafnarhólma í sumar. Formaður heimastjórnar á Borgarfirði eystra segir féð verða nýtt meðal annars í verndun og rannsóknir á lundanum. Yfir 67 þúsund gestir komu í hólmann í fyrra.
Ísland mætir Ísrael í fyrri leik liðanna um laust sæti á HM kvenna í handbolta í kvöld. Leikið verður fyrir luktum dyrum.
