Unglingurinn sem grunaður er um að hafa stungið þrjú ungmenni á Menningarnótt hefur verið fluttur í fangelsið á Hólmsheiði. Óttast var um öryggi hans á Stuðlum.
Ríkisstjórnin hyggst grípa til aðgerða vegna aukins vopnaburðar og ofbeldis meðal ungmenna. Barnamálaráðherra segir að það þurfi þjóðarátak og öryggisgæsla í skólum hefur komið til tals.
Bjarni Benediktsson formaður Sjálfstæðisflokksins segist taka nýjum fylgistölum alvarlega en telur ekki þörf á að endurnýja stefnu flokksins. Hann hefur ekki hafa gert upp við sig hvort hann gefi áfram kost á sér á landsfundi flokksins í febrúar.
Skriður gætu fallið á Snæfellsnesi og sunnanverðum Vestfjörðum síðar í dag. Búist er við úrhellisrigningu.
Ísraelsher ætlar að gera hlé á árásum á Gaza á sunnudag svo að hægt verði að bólusetja börn gegn mænusótt. Ellefu mánaða barn var nýlega greint með sjúkdóminn og var það fyrsta tilfellið á Gaza í tuttugu og fimm ár.
Mikil mengun frá gosstöðvum við Stóra-Skógfell liggur yfir suðvesturhluta landsins. Samkvæmt Veðurstofu Íslands var gosmóðan mest í Vogum, Hveragerði og Selfossi. Ástandið á að skána með deginum.
Kamala Harris ætlar ekki að hætta að útvega Ísraelum vopn verði hún kjörin forseti Bandaríkjanna. Þetta kom fram í fyrsta formlega viðtalinu sem hún veitti í gær - eftir að hún varð frambjóðandi Demókrata í forsetakosningum.
Það kemur í ljós í dag hvaða liðum Víkingur mætir í Sambandsdeildinni í fótbolta. Víkingar unnu Santa Coloma frá Andorra samanlagt 5-0 og urðu um leið annað íslenska liðið til að komast í Sambandsdeildina.
