Heitt vatn er tekið að streyma í hús í bæjum á Suðurnesjum. Í nótt tókst að tengja lagfærða hitaveituæð frá Svartsengi. Vonast er til að hiti verði kominn á öll hús síðar í dag.
Ný gögn staðfesta að landris og kvikusöfnun heldur áfram við Svartsengi, líkur eru því á öðru kvikuhlaupi og eldgosi á næstu vikum.
Ísraelsher drap sextíu og sjö Palestínumenn í borginni Rafah í nótt. Læknar án landamæra vara við því að fjöldamorð á Gaza stigmagnist.
Varaformaður utanríkismálanefndar Alþingis segir mikilvægt að ákveðið hafi verið að senda íslenska embættismenn til Egyptalands vegna þeirra Palestínumanna sem hafa fengið dvalarleyfi hér á landi. Stærsta verkefni utanríkisþjónustunnar sé að koma fólkinu í skjól.
Norðaustan stormur gengur yfir landið og gular viðvaranir eru í gildi fram á kvöld. Víða er slæmt ferðaveður og óvissustig er vegna ofanflóðahættu á Austfjörðum.
Ekki tókst að ljúka loðnumælingum sem hófust í síðustu viku. Rannsóknaskipin fóru í land um helgina vegna veðurs, en vonast er til að þau komist aftur út í kvöld.
Símar og tölvur sakborninganna tveggja í hryðjuverkamálinu, höfðu að geyma myndbönd af skotæfingum þeirra, stefnuskrár og myndbönd af skotárásum fjöldamorðingja, meðal annars í Bandaríkjunum og á Nýja-Sjálandi og leiðbeiningar um hvernig skuli búa til sprengjur.
Bolludagurinn er í dag. Við heimsækjum bakara í fréttatímanum.
Keníamaðurinn Kelvin Kiptum, heimsmethafi í maraþonhlaupi, lést í umferðarslysi ásamt þjálfara sínum Í Kenía í nótt, aðeins 24 ára. Forseti Keníu, minntist Kiptums í morgun og sagði hann einn besta íþróttamann heims.
