Hádegisfréttir

Hádegisfréttir 16. janúar 2024

Of snemmt er að lýsa yfir goslokum á Reykjanesskaga. Engin gosvirkni er sjáanleg. Síðast sáust hraunspýjur koma upp úr nyrðri sprungunni klukkan eitt í nótt. Sprungur suðvestanvert við Grindavík hafa stækkað töluvert. Áfram er mikil hætta.

Starfsmönnum HS Orku tókst í gærkvöld að koma heitu vatni frá Svartsengi til Grindavíkur yfir hrauntunguna. Á miðnætti fór heitt vatn að streyma um dreifikerfið í vesturhluta bæjarins en í austurhlutanum er enn heitavatnslaust. Almannavarnir biðja íbúa vesturhluta Grindavíkur að skila lyklum að húsum sínum svo pípulagningamenn geti kannað stöðuna.

Alvarlegt umferðarslys varð á Hvalfjarðarvegi í morgun þar sem fólksbíll og flutningabíll lentu saman. Þrennt var í bílunum og flutt á sjúkrahús.

Íranar vörpuðu sprengjum á skotmörk í Írak og Sýrlandi í nótt. Stjórnvöld í Íran segja að þeim hafi meðal annars verið beint að bækistöðvum hryðjuverkasamtakanna sem kenna sig við íslamskt ríki.

Barátta Donalds Trumps fyrir að verða forsetaefni Repúblikanaflokksins á ný byrjar vel. Hann vann yfirburðasigur þegar kosið var í fyrsta ríkinu í forvalinu í gær.

Sjónvarpsþáttaröðin Succession kom sá og sigraði á Emmy-verðlaunahátíðinni í gærkvöld. Tónlistarmaðurinn Elton John hlaut þann fádæma heiður að verða svokallaður EGOT-hafi.

Íslenska karlalandsliðið í handbolta mætir Ungverjalandi á Evrópumótinu í Þýskalandi í kvöld. Undir er sigur í riðlinum og góð staða fyrir milliriðil.

Frumflutt

16. jan. 2024

Aðgengilegt til

Rennur ekki út

• 00:01:43 Eldgosið og jarðvísindi
• 00:04:26 Staðan á Reykjanesskaga
• 00:05:50 HS orka og Grindavík
• 00:08:20 Lyklar og íbúafundur
• 00:09:13 Ríkisstjórnarfundur
• 00:11:57 Umferðarslys í Hvalfirði
• 00:12:38 Árásir Írana á Sýrland og Írak
• 00:14:10 Gul veðurviðvörun
• 00:14:58 Trump sigraði í Iowa
• 00:16:20 Emmy-verðlaunin
• 00:18:19 Íþróttir

Útvarpsfréttir.