Hádegisfréttir

Hádegisfréttir 20. apríl 2025

Úkraínumenn og Rússar saka hvorir aðra um brot á þrjátíu klukkustunda vopnahléi sem Pútín Rússlandsforseti boðaði í gær. Úkraínuforseti hvatti í morgun þjóð sína að halda baráttunni áfram.

Lögregla og sjúkraflutningamenn voru kallaðir að heimahúsi í uppsveitum Árnessýslu í morgun vegna konu með skerta meðvitund og áverka. Aðalvarðstjóri segir atvikið sé rannsakað sem slys að svo stöddu en útilokar ekki að eitthvað saknæmt hafi átt sér stað.

Biskup Íslands segir ekki pólitíska afstöðu að fordæma barnamorð á Gaza, árásir á almenna borgara í Úkraínu og hungurdauða í Súdan. Ákall sé um meiri kærleika í samfélaginu og kirkjur landsins séu ákveðið svar við ástandinu.

Þrátt fyrir að sífellt fleiri útskrifist með sveinspróf hér á landi er hundruðum umsókna í iðn- og verknám hafnað á ári hverju. Hætt er við að enn fleiri þurfi frá að víkja í haust þegar einn fjölmennasti árgangur íslandssögunnar færist úr grunnskólum í framhaldsskóla.

Frans páfi veifaði mannfjöldanum af svölum Péturskirkjunnar í Róm í morgun, þrátt fyrir slaka heilsu. Í ávarpi sem var lesið fyrir hans hönd fordæmdi hann gyðingahatur og harmaði ástandið á Gaza. Í ávarpi sínu fordæmdi hann gyðingahatur og ástand íbúa Gaza.

Ekki hafa allir foreldrar efni á að gefa börnum sínum páskaegg. Hjálparstofnun kirkjunnar stóð fyrir söfnun, þar sem um tvöhundruð börn fengu páskaegg.

Karlalið Grindavíkur í fótbolta ætlar að spila heimaleiki sína í Grindavík í sumar. Þjálfari liðsins segir það mikilvægt fyrir bæjarbúa að geta hist í heimabænum og séð lið sitt spila.

Frumflutt

20. apríl 2025

Aðgengilegt til

Rennur ekki út

Útvarpsfréttir.