Aðilum vinnumarkaðarins er frjálst að setja hvaða forsenduákvæði sem er inn í kjarasamninga, segir seðlabankastjóri. Ákvarðanir bankans stýrist þó aldrei af slíku. Hann telur ákvæði um stýrivexti í samningum ekki skynsamlegt.
Viðræður um vopnahlé á Gaza standa yfir í Kaíró. Ísraelar gera enn loftárásir á borgina Rafah.
Vonast er til að heitavatnskerfið á Suðurnesjum nái jafnvægi í dag, en bíða gæti þurft til kvölds eftir fullum þrýstingi. HS Orka fylgist vel með kaldavatnslögnum sem einnig fóru undir hraun og eru lífæðar virkjunarinnar í Svartsengi.
Forstjóri Play segir að staða flugfélagsins sé góð og að engar líkur á að flugfélagið fari í þrot á næstu mánuðum. Umræða um bága stöðu félagsins síðustu daga sé ósanngjörn.
Saksóknari í hryðjuverkamálinu gerir ekki kröfu um tiltekna refsingu yfir sakborningunum tveimur, heldur leggur það alfarið í hendur dómara að meta, í ljósi þess að aldrei hafi verið dæmt fyrir slíkt brot áður.
Flugvélar sem rákust saman á flugi úti við Suðurströndina á sunnudag eru ekki flughæfar eftir atvikið. Rannsóknarnefnd samgönguslysa fer með rannsókn málsins, sem talið er alvarlegt.
Lögregla í Gautaborg í Svíþjóð leitar að manni sem saknað er eftir eldsvoða í vatnsrennibrautagarði í borginni í gær.
Í dag er sprengidagur og þá er til siðs að úða í sig saltkjöti og baunum. Búast má við að margir standi vel saddir upp frá borðum eftir hádegismatinn.
