Tímabundið bann við hvalveiðum verður ekki framlengt. Matvælaráðherra greindi frá þessu rétt fyrir hádegi. Bannið rennur út á miðnætti. Hertar reglur um veiðiaðferðir, þjálfun og eftirlit verða birtar í dag. Ráðherra segist ekki vera að láta undan þrýstingi samstarfsflokka í ríkisstjórn.
Formaður Verkalýðsfélags Akraness fagnar ákvörðuninni og vonar að veiðar geti hafist strax á morgun. Lögmaður Náttúruverndarsamtaka Íslands segir daginn sorgardag.
Sjötíu og þrír, hið minnsta, fórust í eldsvoða í Jóhannesarborg í Suður-Afríku í nótt. Eldur kviknaði í byggingu í eigu borgarinnar sem sagt er að glæpasamtök hafi yfirtekið og leigt til fátæks fólks.
Heyrnarskertir eru útundan í heilbrigðiskerfinu og fötlun þeirra ekki talin nógu merkileg til að neinn eigi að sinna henni, segir forstjóri Heyrnar- og talmeinastöðvarinnar. Starfsemi stöðvarinnar sé sjálfhætt, verði ekki bætt úr vanda hennar.
Fólk á Suðvesturlandi er hvatt til aðgæslu við sjávarsíðuna og að huga að lausamunum þegar vonskuveður gengur yfir annað kvöld og fram eftir nóttu.
Hátt í tuttugu flugmönnum Play hefur verið boðið starf hjá Icelandair í haust. Forstjóri Play segir að reynt verði að halda í starfsfólkið. Enginn hafi enn tilkynnt uppsögn.
Forsætisráðherra Bretlands hefur gert breytingar á ríkisstjórn sinni. Hann skipaði nýjan varnarmálaráðherra í morgun í stað Ben Wallace sem sagði af sér.
