Evrópusambandið ætlar að fresta því að hækka tolla á bandarískar vörur, eftir kúvendingu Bandaríkjaforseta í gærkvöld - en áfram verður unnið að undirbúningi tollahækkana, náist ekki að semja innan þriggja mánaða.
Frestun á gildistöku tollanna kom ráðgjöfum forsetans í opna skjöldu. Ótti við fjármálakreppu er talinn hafa ráðið ákvörðuninni. Dósent í viðskiptafræði líkir yfirlýsingunum við jójó.
Hryðjuverkaógn á Íslandi hefur aukist lítillega að mati greiningardeildar Ríkislögreglustjóra. Ógn er talin stafa fyrst og fremst af ofbeldissinnuðum mönnum, í litlum hópum, eða einum síns liðs, sem sæki hvatningu í hægri öfga áróður .
Atvinnuráðherra segir ekki standa til að bakka með veiðigjald þrátt fyrir þráláta og harða gagnrýni frá stjórnarandstöðunni á þingi.
Greiningardeild Landsbankans spáir því að verðbólga aukist lítillega milli mánaða.
Matvælastofnun ætlar sjálf að meta hvort snjóflóð gætu valdið því að lax slyppi úr fyrirhuguðum eldissvæðum í Seyðisfirði. Yfir 13 þúsund manns mótmæla eldinu.
Vel var tekið á móti Höllu Tómasdóttur forseta í Þrándheimi í morgun. Hún leit við í háskólanum þar sem hún talaði við íslenska nemendur.
Ísland getur í kvöld tryggt sér sæti á heimsmeistaramóti kvenna í handbolta. Það yrði þriðja stórmót liðsins í röð. Eins og í gærkvöld verður leikið við Ísrael fyrir luktum dyrum.
