Mál Ríkislögreglustjóra og önnur sambærileg mál hjá hinu opinberlega þurfa að hafa afleiðingar, segir formaður stjórnskipunar- og eftirlitsnefndar Alþingis. Dómsmálaáðherra hlýtur að hafa stöðu ríkislögreglustjóra til skoðunar, segir samflokksmaður ráðherrans.
Tveir ungir karlmenn voru handteknir grunaðir um að hafa selt mörg hundruð ungmennum fölsuð skilríki á ísland punktur is. Framkvæmdastjóri ísland punktur is segir öryggi síðunnar tryggt, mennirnir hafi eingöngu breytt hvernig vefsíðan birtist öðrum.
Ekkert bólar á hnúfubaki sem reynt var að bjarga austan við Hrísey á Eyjafirði í gær. Enn er ekki ljóst í hverju hann festist.
Uppreisnarher RSF í Súdan er að öllum líkindum enn að fremja fjöldamorð á almennum borgurum í borginni El-Fasher. Nýjar gervihnattamyndir benda til þess að RSF standi í kerfisbundnum hreinsunum á þjóðernisminnihlutahópum þar.
Sjálfstæðisflokkurinn hefur auglýst Valhöll - höfuðstöðvar flokksins - til sölu. Flokkurinn leitar að nýju húsnæði eftir 50 ár við Hálaeitisbraut.
Öryggisráð Sameinuðu þjóðanna samþykkti í gær ályktun með stuðningsyfirlýsingu við fullveldi Marokkó yfir Vestur-Sahara. Deilt hefur verið um yfirráð yfir svæðinu í fimmtíu ár.
Maðurinn sem áður var þekktur sem Andrés Bretaprins hefur misst alla titla og nafnbætur í kjölfar ásakana um kynferðisbrot. Hann fellur þar með úr hópi erlendra einstaklinga sem fá íslenskt nafn.
Íslandsmeistarar Stjörnunnar hafa átt erfitt uppdráttar í byrjun leiktíðar í Bónusdeild karla í körfubolta og hafa aðeins unnið einn leik af fimm. Þeir töpuðu naumlega fyrir Tindastóli í gærkvöldi.
