Aðalmeðferð er hafin fyrir dómi vegna manndráps í Ólafsfirði í október 2022. Ákærði svaraði spurningum dómara í dag og sagðist meðal annars ekki hafa vitað af andláti Tómasar Waagfjörð fyrr en daginn eftir.
Hálaunafólk á rétt á kjarabótum til jafns við alla aðra, að sögn formanns flugumferðastjóra. Fundur verður í kjaradeilu flugumferðastjóra og Isavia eftir hádegi. Fátt bendir til að samningar náist. Að óbreyttu kemur til vinnustöðvunar í fyrramálið sem mun hafa veruleg áhrif á flugsamgöngur.
Utanríkisráðherra Úkraínu varar við því sem hann kallar hörmulegar afleiðingar, náist ekki samstaða á leiðtogafundi Evrópusambandsins í vikunni um að bjóða Úkraínu til aðildarviðræðna. Ungverjar setja sig upp á móti því.
Formaður Kennarasambandsins segir ekki vænlegt að taka aftur upp samræmd próf sem mælikvarða fyrir inngöngu nemenda í framhaldsskóla. Samræmd próf í fjórða, sjöunda og níunda bekk geti þó verið gagnleg mælitæki.
Katarskir milligöngumenn segja vopnahlé á Gaza ekki í augsýn en ætla að halda áfram að reyna. Forsætisráðherra Ísraels segir marga Hamas-liða hafa gefist upp og það sýni að endalok samtakanna séu nærri.
Nýr forseti Argentínu segir landa sína mega búast við áfalli ? svo róttækar séu hugmyndir hans um endurreisn efnahags landsins. Javier Milei var settur í embætti í Buenos Aires í gær með mikilli viðhöfn.
Heitavatnsnotkun er mikil í kuldatíðinni fyrir norðan. Sauðkrækingar eru beðnir að sleppa ferðum í heita pottinn á meðan ekki hlýnar.
Samtök iðnaðarins telja að rafmyntargröftur hafi bætt orkunýtni hér á landi. Varaþingmaður Pírata, sem lagði fram fyrispurn um rafmyntargröft á Alþingi, er því ósammála.
