Það stefnir í mest spennandi forsetakosningar í rúmlega fjörtíu ár, segir prófessor í stjórnmálafræði. Samkvæmt nýjustu skoðanakönnunum eru fjögur efstu samanlagt með hátt í 90 prósent atkvæða.
Bandaríkin ætla að veita Úkraínu viðbótar hernaðaraðstoð til að styrkja loftvarnir. Forseti Úkraínu segir biðina hafa verið dýrkeypta.
Hrauntunga úr eldgosinu við Sundhnjúksgíga er farin að teygja sig yfir varnargarð norðan við Grindavík. Lítil hætta stafar af henni. Annað eldgos gæti hafist á hverri stundu.
Hamas-samtökin fara yfir tillögur Ísraelsstjórnar að skilmálum vopnahlés á Gaza. Fulltrúar Egypta eru komnir til Ísraels til viðræðna við stjórnvöld þar.
Stuðlagil í Jökuldal og Múlagljúfur í Öræfasveit fá hvort um sig 90 milljónir króna til uppbyggingar úr Framkvæmdasjóði ferðamannastaða. Fjöldi þeirra sem fara um Múlagljúfur hefur á fáeinum árum farið úr nokkrum þúsundum í yfir hundrað þúsund.
Þingmaður Sannra Finna hefur verið handtekinn, grunaður um að hafa hleypt skoti úr byssu við skemmtistað eftir að hópslagsmál brutust út. Hann er einnig grunaður um að hafa beint byssunni að fólki.
Landeigandi í Stöðvarfirði segir til greina koma að höfða skaðabótamál gegn Fjarðabyggð sem ekki hafi sinnt skyldu sinni að smala ágangsfé af landi hans. Innviðaráðuneytið hefur úrskurðað að sveitarfélagið hefði átt að láta smala eins fljótt og hægt var.
