Utanríkisráðherra segir aðgerðir Ísraela á Gaza, þar sem þeir beita hungri sem vopni, vera stríðsglæp. Alþjóðasamfélagið verði að gera meira en vera með yfirlýsingar. Hún sótti fund utanríkisráðherra rúmlega 20 ríkja á Spáni um helgina. Á fjórða tug voru drepin í árás Ísraelshers á skóla á Gaza í nótt.
Trump Bandaríkjaforseti ætlar að fresta því að setja fimmtíu prósenta toll á vörur frá Evrópusambandinu, eins og hann hótaði á föstudag. Þetta tilkynnti hann í gær, eftir símtal við Ursulu von der Leyen, forseta framkvæmdastjórnar ESB.
Þrír sjómenn hafa kært framkvæmdaleyfi fyrir lagningu sæstrengs í Arnarfirði til úrskurðarnefndar umhverfis- og auðlindamála. Þeir segja strenginn eyðileggja bestu rækjumiðin í firðinum.
Vinstrihreyfingin grænt framboð býður fram undir eigin merkjum í Reykjavík í sveitastjórnakosningum á næsta ári, segir formaður flokksins. Ákvarðanir um blönduð framboð eða annars konar samstarf verði teknar í hverju sveitarfélagi fyrir sig.
Ísland og hin EES ríkin semja um aðgang að innkaupum Evrópusambandsins á lyfjum og lækningavörum, komi til neyðarástands í heilbrigðismálum.
Frú Ragnheiður auglýsir eftir tjöldum og svefnpokum fyrir heimilislausa fíkniefnanotendur sem ekki vilja gista í neyðarskýlum.
Aron Pálmarsson, handboltamaður hefur ákveðið að leggja skóna á hilluna í sumar. Landsliðþjálfari Íslands segir Aron vera besta handboltamann Íslands fyrr og síðar, ásamt Ólafi Stefánssyni.
