Utanríkisráðherra Danmerkur fordæmir tilraunir bandarískra útsendara til að reyna að hafa áhrif á samband Grænlendinga og Dana. Hann hefur kallað sendifulltrúa Bandaríkjanna á Grænlandi á sinn fund.
Formaður Kennarasambands Íslands vonar að launahækkun sem BHM og BSRB félagar fá um mánaðamótin nái einnig til KÍ. Málið sé í höndum ríkissáttasemjara og fari mögulega fyrir Félagsdóm.
Austfirðingar geta ekki gengið að því vísu að næstu jarðgöng verði á Austurlandi. Til greina kemur einnig að breyta forgangsröðun á jarðgöngum innan landshlutans. Þetta kom fram á fundi innviðaráðherra á Egilsstöðum í gær.
Mikil hækkun gatnagerðargjalda í Reykjavík 1. september á eftir að hækka íbúðaverð, letja húsbyggjendur eða draga úr gæðum, segir framkvæmdastjóri fasteignaþróunarfélags. Tuttuguföld hækkun á bílastæðum í kjöllurum eigi líka eftir að hafa áhrif.
Björgunarsveitir á Hellu og Hvolsvelli voru kallaðar út í morgun vegna ferðamanna sem keyrðu út í Markarfljót en björgunarsveitarmenn náðu fólkinu í land. Ár eru vatnsmiklar á hálendinu en rigningu á að slota með deginum.
Sveitarfélagið Norðurþing vill reisa gagnaver á Bakka við Húsavík. Minnst fimmtíu störf gætu skapast til frambúðar með starfseminni.
Kvikmyndin Ástin sem eftir er í leikstjórn Hlyns Pálmasonar er framlag Íslands til Óskarsverðlaunanna, í flokknum besta alþjóðlega kvikmyndin.
Söngvari bandarísku sveitarinnar Smashing Pumpkins ávarpaði áhorfendur á íslensku í troðfullri Laugardalshöll í gær. Hann var ánægður með kvöldið en lítt hrifinn af ferðaþjónustu á Íslandi.
