Stjórnarandstaðan segir viðbrögð íslenskra stjórnvalda, um að fresta greiðslum til Palestínuflóttamannaaðstoðar Sameinuðu þjóðanna, harkaleg. Fara ætti að fordæmi Norðmanna, sem ætla að halda fjármögnun áfram.
Aðalframkvæmdastjóri Sameinuðu þjóðanna biðlar til ríkja heims að halda áfram stuðningi við stofnunina og heitir að draga þá til ábyrgðar sem voru viðriðnir fjöldamorð Hamas í byrjun október.
Áætlun um hvenær og hvernig Grindvíkingar geta vitjað heimila sinna verður kynnt á upplýsingafundi klukkan eitt.
Fjármálaráðherra segir engar ákvarðanir liggja fyrir um frestun stórra verkefna, eins og þjóðarhallar eða samgönguáætlunar, vegna óvæntra útgjalda í Grindavík.
Fulltrúar vinstrimanna og íhaldsmanna eru taldir líklegastir til sigurs í forsetakosningunum í Finnlandi í dag, þótt leiðtogi þjóðernisflokksins Sannra Finna gæti blandað sér í baráttuna.
Breyting á aðalskipulagi Borgarbyggðar á að auðvelda uppbyggingu íbúðarhúsa og atvinnureksturs á lögbýlisjörðum. Gott ræktanlegt land á þó enn að nýta undir matvælaframleiðslu.
Stærsta skemmtiferðaskip heims lagði úr höfn í Miami í Bandaríkjunum í gær. Náttúruverndarsamtök hafa áhyggjur af mengun frá því, en eigandinn segir það óþarfa.
Úrslitin ráðast á Evrópumótinu í handbolta síðdegis í dag, þegar Frakkar og Danir mætast.
