Tólf ára barn er grunað um að hafa skotið jafnaldra sinn til bana og sært tvö önnur börn alvarlega í grunnskóla í Finnlandi í morgun. Börnin voru öll í sama bekk.
Svandís Svavarsdóttir matvælaráðherra snýr aftur til starfa á morgun. Hún hefur verið í veikindaleyfi síðan í janúar.
Sjö starfsmenn alþjóðlegra hjálparsamtaka voru drepnir í árás Ísraelshers á Gaza í nótt. Samtökin höfðu nýverið dreift hundruðum tonna af mat til bágstaddra. Stofnandi þeirra segir Ísrael beita hungri sem vopni gegn Gazabúum.
Skipstjórinn á frystitogaranum Tómasi Þorvaldssyni komst við á innsiglingunni í Grindavíkurhöfn í morgun, svo miklu máli skipti það að geta landað í heimahöfn. Þar hefur togari ekki landað í rúma fimm mánuði.
Óvíst er að það takist að opna Fjarðarheiði og rjúfa einangrun Seyðfirðinga í dag. Djúp snjógöng hafa myndast á heiðinni. Vegagerðinni og björgunarsveitinni Ísólfi tókst að fylgja 95 bílum yfir heiðina í gærkvöld.
Tjónaskrá fyrir Úkraínu, sem sett var á laggirnar á leiðtogafundi Evrópuráðsins hér á landi í fyrravor, verður formlega opnuð á ráðstefnu sem stendur yfir í Haag í Hollandi.
Hætt hefur verið við leikskóla í nýrri íbúabyggð í Vesturbugt við Granda í Reykjavík vegna of mikillar umferðar og mengunar. Formaður skóla- og frístundaráðs telur ólíklegt að hægt sé að draga úr umferðinni.
Icelandair segir að bókunarstaðan í ár sé góð og gerir ráð fyrir meiri hagnaði en í fyrra.
