Nú í haust opnaði Þorláksskóli, skóli fyrir einhverf börn, í Garðabæ. Vigdís Gunnarsdóttir er stofnandi skólans og sonur hennar verður einn nemenda, en hún segist hafa farið út í þetta verkefni því ekki sé til skólaumhverfi sem henti honum og fleiri börnum. Vigdís hefur undirbúið opnun skólans frá því í fyrra og við fengum hana til okkar og heyrðum af því hvernig maður stofnar skóla og hvernig starfið fer af stað.
Fréttastofa RÚV greindi frá því í gær að að minnsta kosti tíu Íslendingar hefðu lent í vandræðum eftir að hafa leigt íbúðir á Spáni af leigufélaginu Sólarmegin. Fólk greiddi stórfé en fékk ekki húsnæðið vegna þess að móðurfélag Sólarmegin er komið í greiðslustöðvun. Ingi Freyr Vilhjálmsson, umsjónarmaður þáttarins Þetta helst á Rás 1, hefur verið að skoða þetta mál og hann fór yfir það helsta með okkur.
Eitt stærsta klúður undanfarinna ára fyrir okkur mannfólkið er að við skiptum út gulum ljósum fyrir köld led ljós. Í auganu eru frumur sem hafa það hlutverk að segja heilanum hvort það sé dagur eða nótt. Eftir köldu led skiptinguna eru kvöld ljósin okkar, líffræðilega séð orðin morgunljós. Það bælir melatónín, merkið sem segir líkamanum að nóttin sé komin. Svona skrifar Tryggvi Hjaltason, áhugamaður um heilbrigðari lýsingu, framkvæmdastjóri farsældarhraðalsins Andvara og fjölskyldufaðir úr Eyjum á facebook síðu sinni. Tryggvi ætlar að útskýra þetta betur fyrir okkur.
Í kvöld verður mikið um dýrðir í sundlaug Grenivíkur þegar fjallað verður um sundlaugamenningu í Grýtubakkahreppi í tali og tónum. Við slógum á þráðinn til Grenivíkur og heyrðum í Þorgeiri Rúnari Finnssyni söngvara í Húsbandinu sem er meðal þeirra sem koma fram í kvöld.
Heimildamyndin Þetta er ekkert mál um Jón Pál Sigmarsson snýr aftur í bíó í dag, 20 árum eftir að hún sló aðsóknarmet. Í tilefni af tímamótunum er myndin endursýnd í Smárabíó. Hjalti Úrsus Árnason mætti til okkar og fór yfir sögu Jóns Páls og aflrauna á Íslandi en óhætt er að segja að afraunir séu hluti af menningararfi þjóðarinnar.
Nýverið kom út bókin Sögur af vellinum eftir Ásmund Friðriksson þar sem mannlífið á Keflavíkurflugvelli frá 1952 - 2006 er skrásett. Rætt er við fólk sem tengdist vellinum á einhvern hátt og saga þessa tíma rituð á óformlegan og mannlegan hátt. Bókin hefur vakið heilmikla athygli og viðbrögð og við fengum Ásmund til okkar í spjall til að rifja upp þennan tíma.
