Í gær ræddum við við Sverri Norland og börnin hans tvö þau Ölmu og Baltasar en tilefnið var útileiksvæði í borginni og þeirra hlið á því máli. Sverri hafði þá áður skrifað áhugaverða færslu á FB um nýtt svæði við Hlemm þar sem honum fannst skorta hugmyndaauðgi og þar voru börnin honum sammála. í dag heyrðum við í borgarhönnuðinn Rebekku Guðmundsdóttur sem sagði okkur af því hvað haft sé til hliðsjónar þegar ný svæði eru skipulögð fyrir börn og fræddi okkur um þetta svæði við Hlemm.
Í nýrri skýrslu sem nefnist “Heilbrigðisþjónusta sem borgar sig sem Parkinsonsamtökin á Íslandi létu vinna og var afhent Heilbrigðisráðherra fyrr í dag kemur fram að Íslendingar með Parkinson verði tvöfalt fleiri eftir fimmtán ár. Í skýrslunni kemur enn fremur fram að árlega muni beinn kostnaður ríkisins vegna sjúkdómsins fara úr fimm milljörðum króna í tíu milljarða. Erna Guðmundsdóttir framkvæmdastjóri Parkinson samtakanna kom til okkar í þáttinn í dag.
Það bárust af því fréttir að Jazzinn á Jómfrúnni í Reykjavík væri að hefja sitt þrítugasta starfsár. Jafnframt hefur það komið fram að Jómfrúin sé komin austur fyrir fjall nánar tiltekið í Hveragerði og hefur þar með tekið yfir Matkránna sem þar var rekin. Jakob E. Jakobsson vert á Jómfrúnni settist hjá okkur og sagði okkur allt um málið.
Við ætlum líka að heyra af heimildarmynd sem nefnist Bóndinn og verksmiðjan en myndin hefur verið 11 ár í smíðum og höfundur hennar er Hrafnhildur Gunnarsdóttir og unnin í samstarfi við Barða Guðmundsson og myndin verður frumsýnd á Skjaldborgarhátíðnni á Patreksfirði um helgina.
Hinsegin dagar og Samtökin '78 taka sameiginlega þátt í Mannréttindaráðstefnu WorldPride, sem fram fer dagana 4.–6. júní í Washington, DC. Siggi okkar Gunnars er í frí erlendis en var viðstaddur rástefnuna og sendi okkur glænýtt viðtal sem hann tók við atvinnuvegaráðherra Hönnu Katrínu Friðriksson sem ávarpaði rástefnuna fyrr í dag.
Og gróður var kominn vel af stað eftir sögulegan hlýindakafla í maí, en honum lauk með látum feins og hefur ekki farið framhjá neinum væntanlega. En hvaða ahrif hefur þetta kuldakast á gróður, og ekki síst berjasprettu? Sveinn Rúnar Hauksson læknir og berjasérfræðingur kom til okkar og fór yfir stöðuna.
