Bjarki Már Baxter er foreldri barna á grunnskólaaldri og eins og svo margir aðrir foreldrar leggur hann sig fram við að aðstoða þau við heimanámið og fylgjast með námsárangri. Hann segir það þó hægara sagt en gert eftir að einkunnagjöf í formi tölustafa var lögð niður og bókstafir teknir upp. Bjarki segir að einkunnagjöf með bókstöfum sé ógagnsæ og ruglandi og að eldra fyrirkomulagið þar sem einkunnir voru á skalanum 1 og upp í 10 hafi verið einfaldara og gagnsærra kerfi. Við ræddum þessar hugleiðingar Bjarka Más stöðu menntamála og þá staðreynd að samkvæmt OECD hafi námsárangri grunnskólabarna hér á landi hrakað.
Donald Trump Bandaríkjaforseti ætlar að senda þjóðvarðaliða til höfuðborgarinnar Washington DC og færa lögreglu borgarinnar undir alríkisvald. Þetta kom fram á blaðamannafundi hans fyrr í dag, en Trump lýsti því yfir á samfélagsmiðli sínum Truth Social í gær að hann ætlaði að betrumbæta borgina, meðal annar með því að handtaka glæpamenn hratt og örugglega og flytja heimilislausa langt frá borgarmörkunum. Við fengum Friðjón Friðjónsson borgarfulltrúa og áhugamann um bandarísk stjórnmál til okkar til að fara betur yfir þetta.
Við ræddum við Jón Kristjánsson fiskifræðing í Síðdegisútvarpinu á föstudaginn um laxveiði og þá venju að veiða og sleppa, sem hann segir argasta óþarfa, og ekki gera neitt gagn þegar kemur að því að vernda laxastofninn. Það eru skiptar skoðanir um þetta mál, og við ræddum við Guðna Guðbergsson sviðsstjóra ferskvatns- og eldissviðs á Hafrannsóknastofnun síðar í þættinum.
Á morgun hefst á Akureyri önnur alþjóðlega ráðstefnan um hreyfiveiki (International Congress on Motion Sickness) þar sem sérfræðingar víðs vegar að úr heiminum koma saman til að ræða nýjustu rannsóknir og lausnir á þessu viðfangsefni. Hvað er hreyfiveiki og hvað veldur henni. Við forvitnuðumst um ráðstefnuna og heyrðum í Hannesi Petersen lækni og prófessor.
Umræða um að ferðamann fari ekki nógu varlega í Reynisfjöru og fylgi ekki öryggisleiðbeiningum er á villigötum þegar þær leiðbeiningar er að finna á skilti sem fauk um koll í íslensku roki og er ekki sýnilegt neinum, að mati Magnúsar Rannvers Rafnssonar verkfræðings. Hann segir í aðsendri grein á vísi augljóst að lögum um mannvirki hafi ekki verið fylgt við hönnun og eða uppsetningu skiltisins, sem hefur legið niðri í lengri tíma, og spyr hvers vegna fjörunni hafi ekki verið lokað þar til nýtt skilti hafi verið sett upp. Við ræddum þetta við Magnús.
