Margir vöknuðu upp við þau tíðindi á fréttamiðlum í morgun að þinglok væru loksins í nánd, og maraþon fundarhöld gærkvöldsins virtust vera að skila árangri. Enn er þó talað á alþingi, en fer þessu mögulega að ljúka? Erla María Markúsdóttir fréttamaður fór yfir stöðuna.
EM í körfuknattleik karla 2025, EuroBasket eins og keppnin er kölluð, fer fram í haust og munu strákarnir okkar spila í Póllandi. En EuroBasket bikarinn er á ferð um Evrópu „trophy tour“ og stoppar hjá átta þjóðum af þeim tuttuguogfjórum sem komast á mótið. Ein þeirra er Ísland. EM bikarinn er kominn til landsins og mun fara á nokkra þekkta staði á Íslandi þar sem hann verður myndaður í íslenskri náttúru. Einnig mun bikarinn heimsæka eitt af þeim körfuboltanámskeiðum sem er í gangi þessa daganna. Hannes Jónsson, framkvæmdastjóri KKÍ kom til okkar.
Ein er sú hljómsveit sem hefur gert út á að breiða yfir tónlist frá níunda áratugnum, eitís eins og hann er gjarnan kallaður. Hljómsveitin kallar sig Hr. Eydís og fer Örlygur Smári tónlistarmaður fyrir þeim. Öggi kom okkur í gott stuð fyrir helgina með því að koma með nýjasta útspil Hr. Eydís, slagarann góða Heya Heya með The Blaze frá 1982. Lagið hefur verið íslenskað og kallast nú Heima, Heimaey!
Það getur kostað fúlgur fjár að leggja á bílastæðum við náttúruperlur úti á landi og oft ekki ljóst hvort og þá hvernig á að borga fyrir stæðið. Lára Ómarsdóttir ræddi þetta við okkur.
Á dögunum hlaut Þráinn Freyr Vigfússon stjörnukokkur á Óx og Zumac græna Michellin stjörnu. Er maðurinn að safna stjörnum? Þráinn kom til okkar.
Óhætt er að segja að það sé líf í tuskunum á Akureyri þessa helgina. Ríflega 2200 manns eru nú gestkomandi í bænum vegna N1 móts KA sem er nú haldið í 39. skiptið. Ágúst Stefánsson, mótstjóri, var á línunni hjá okkur.
