Innrás í Gaza-borg hófst í morgun eftir þungar árásir í nótt og Ísraelsher segir að fyrstu stig yfirtöku Gaza-borgar sé hafin. 60 þúsund manna varalið er væntanlegt á næstu vikum til þess að ná yfirráðum yfir allri borginni. Oddur Þórðarson fréttamaður hefur fylgst með þróun mála á Gaza í dag kom til okkar.
Á sunnudaginn kemur verður boðað til gleðskapar við Úlfljótsvatn þar sem fagna á því að hringvegurinn í kringum Þingvallavatn hefur nú allur verið lagður bundnu slitlagi. Ýmsir koma að málinu og Lína Björg Tryggvadóttir byggðaþróunarfulltrúi í uppsveitum Árnessýslu var á línunni hjá okkur.
Fulltrúar íslensku sjónvarpsstöðvanna auglýsa nú eftir innsendingum til Íslensku sjónvarpsverðlaunna sem verða nú veitt í fyrsta sinn frá ákvörðun Eddunnar að beina sjónum eingöngu á kvikmyndagerð. Þrír stærstu ljósvakamiðlar landsins standa að verðlaununum, sem verða veitt með pompi og prakt í Gamla bíói í lok Október. Gísli Berg framleiðslustjóri RÚV sagði okkur betur frá þessu.
Linda K. Pálsdóttir móðir í Reykjanesbæ brýnir fyrir foreldrum að vera vakandi yfir hrekk sem gengur út á að losa dekk á reiðhjólum svo lítið beri á, en tíu ára sonur hennar er stórslasaður eftir að hjól hans nánast hrökk í sundur þegar hann var á leið heim af fótboltaæfingu. Við hringdum í Lindu.
Menningarnótt er fram undan og borgin mun iða af lífi, stemmingu og menningu. Fjöldi safna af öllum stærðum og gerðum opnar dyr sínar, m.a. Þjóðminjasafnið, sem reyndar býður líka í kaupstaðarferð utandyra. Arna Björg Bjarnadóttir þróunar- og fræðslustjóri Þjóðminjasafnsins kom til okkar.
Það er ekki bara menning í Reykjavík og við heyrðum af líflegu menningarlífi á Suðurlandi þar sem m.a. fer fram Skáldkonukvöld í kvöld - Margrét Blöndal deildarstjóri Menningar- og upplýsingardeildar Árborgar var á línunni.
