Þjást plönturnar þínar af skammdegisþunglyndi? Það er þrautinni þyngra að halda inniplöntum líflegum á þessum dimmustu dögum vetrarins. Hvað skal gera? Guðríður Helgadóttir garðyrkjufræðingur gaf okkur sín bestu ráð.
Forseti Alþingis, Þórunn Sveinbjarnardóttir, bað þingið í gær afsökunar á því að hafa sagt „Ég er komin með nóg. Djöfulsins, helvítis, andskotans pakk,“ á leið úr stól forseta á föstudaginn. Nokkuð ljóst er að stemmningin á þinginu var orðin súr. Ef Unnur Ýr Konráðsdóttir væri mannauðsstjóri Alþingis, hvernig myndi hún tækla andann? Hún kom til okkar.
Í síðustu viku var ljóst að Ísrael fær að taka þátt í Eurovision-keppninni í Austurríki á næsta ári. Þegar það var ljóst tilkynntu Belgía, Holland, Írland, Spánn og Slóvenía að þau myndu ekki taka þátt að óbreyttu. Í dag tekur stjórn RÚV til umfjöllunar hvort Ísland verði á meðal þátttakenda í keppninni en stjórnin samþykkti í síðustu viku að beina þeim tilmælum til stjórnar Sambands evrópskra sjónvarpsstöðva, EBU, að vísa Ísrael úr keppninni næsta vor. En hvað nú? Hver er framtíð keppninnar í augum aðdáenda hennar? Viktor Orri Valgarðsson, stjórnmálafræðingur og Eurovision-aðdáandi, kíkti í spjall.
Stafrænt ofbeldi hefur opnað gerendum áður óþekktar leiðir til að áreita, stjórna og þagga niður í konum. Þetta kemur fram í pistli sem Guðný S. Bjarnadóttir birti á Vísi í gær undir fyrirsögninni gerendur fá frípassa í ofbeldismálum. Í pistlinum sagði hún að meirihluti íslenskra kvenna sem verði fyrir stafrænu ofbeldi tilkynni það ekki vegna vantrausts á kerfinu. Guðný kom í Morgunútvarpið og fór yfir stöðuna.
