Morgunútvarpið

Betri en flestir,Bakslagið,staðsetning Tækniskólans og andleg heilsa kvenna með PMOS

Ný rannsókn sýnir að andleg heilsa og sjálfsmat kvenna á Íslandi með PMOS er mun verri en kvenna án PMOS. PMOS er efnaskipta- og innkirtlaheilkenni sem háir um 10% kvenna og einkennin geta meðal annars verið óreglulegar blæðingar, aukinn hárvöxtur í andliti og/eða á líkama, húðvandi eins og feit húð og bólumyndun, hárþynning og hárlos á höfði, óútskýrð þyngdaraukning, auk þreytu og orkuleysis. Málþing PCOS/PMOS-samtakanna fer fram á morgun klukkan 18.30 í Tjarnarsal Íslenskrar erfðagreiningar en Guðrún Rútsdóttir lektor og Hafrún Helga Guðmundsdóttir, sem framkvæmdi rannsóknina ásamt Aldísi Björk Ingadóttur, komu til okkar.

Tækniskólinn hefur verið sætasta stelpan á ballinu eftir að það kom í ljós að Hafnafirði tókst ekki að afhenda lóð sem fyrirhuguð var undir skólann í tæka tíð. Reykjavík, Mosfellsbær og Akureyrir hafa boðið fram lóðir og nú er stóra spurningin: Hvar endar Tækniskólinn? Hildur Ingvarsdóttir, skólameistari Tækniskólans, kom til okkar.

Hljómsveitin Bæjarins bestu var áberandi í hipp hopp-senunni upp úr aldamótum. Hljómsveitin hefur legið í dvala en á síðustu árum hafa þeir Halldór Halldórsson, Daníel Ólafsson og Kjartan Atli Kjartansson orðnir þekktari fyrir eitthvað allt annað en að rappa. Nú eru þeir allir komnir á fimmtugsaldurinn og hafa endurnýjað kynni sín í hlaðvarpinu Betri en flestir og eru að þátt á sviðinu í Tónabíói annað kvöld þar sem hið óvænta verður í aðalhlutverki. Þeir komu til okkar með læti.

Í fyrra kom út rannsóknarskýrsla, kortlagning á stöðu líðan og réttindum hinsegin fólks á Íslandi, þar sem í ljós kemur að líðan fólks virðist ekki í samræmi við þau lagalegu réttindi sem hafa náðst á síðustu áratugum. Talað erum bakslag en hvað gerðist á síðustu árum og af hverju? Anna Gyða Sigurgísladóttir veltir þessum spurningum og fleiri fyrir sér í þáttunum Bakslagið á Rás 1 og hún kom og sagði okkur frá því sem hún hefur komist að.