Ísland er hástökkvari í notkun svefnlyfja samkvæmt úttekt rannsakenda á Norðurlöndum árið 2020. Þetta ár notuðu Íslendingar rúmlega 6 sinnum meira af algengustu svefnlyfjunum en Danir til að mynda. Anna Birna Almarsdóttir, prófessor við Lyfjafræðideild Kaupmannahafnarháskóla og verkefnisstjóri Sofðuvel-átaksins segir okkur betur frá.
Fjallað var um áhrif hnúfubaka á loðnustofna í Morgunblaðinu í gær. Þar var meðal annars haft eftir Vilhjálmi Árnasyni þingmanni Sjálfstæðisflokks að til skoðunar sé að leggja fram þingsályktunartillögu um rannsóknir á afráni hnúfubaka á loðnustofninum við Ísland. En hvað er vitað um tengsl þarna á milli ef einhver eru? Edda Elísabet Magnúsdóttir, lektor í líffræði og sérfræðingur í sjávarspendýrum kemur til okkar.
Grænlendingar ganga að kjörborðinu í dag en kosningar þar í landi hafa sjaldan vakið jafn mikla athygli eðli málsins samkvæmt. Við ræðum við Ingu Dóru Guðmundsdóttur Markussen, fyrrverandi formann Siumut-flokksins í Nuuk, um þau mál sem einkennt hafa kosningabaráttuna.
Dagur B. Eggertsson, þingmaður Samfylkingarinnar, og Snorri Másson, þingmaður Miðflokksins, verða gestir okkar eftir átta fréttir þegar við ræðum stöðuna á húsnæðismarkaði og úttekt í Innherja þar sem fram kom að séreignarstefnan væri á hröðu undanhaldi og að eftir einungis fimm ár eigi 107 þúsund einstaklingar á aldrinum 25 til 49 ára hér á landi ekki sína eigin íbúð.
Guðmundur Jóhannsson, tæknispekúlant Morgunútvarpsins, mætir í sitt hálfsmánaðarlega spjall um fréttir úr heimi tækninnar.
Við höldum áfram að ræða við þá sem bjóða sig fram til formanns í VR, nú Bjarna Þór Sigurðsson og Þorstein Skúla Sveinsson.
