Guðbjörg Pálsdóttir hjúkrunarfræðingur rannsakar nú í doktorsnámi sínu við Háskóla Íslands með ítarlegum hætti hvaða heilbrigðisþjónustu erlendum ferðamönnum er veitt hér á landi. Það gefur aldrei fyrr verið rannsakað hér á landi. Hún mætir í fyrsta bolla og segir okkur frá.
Guðmundur Ingi Þóroddsson, formaður Afstöðu, verður gestur okkar eftir fréttayfirlitið hálf átta en hann skrifaði grein í gær þar sem hann spurði hvort lestur væri lykillinn að endurhæfingu.
Suður-Kóreumenn kusu sér nýjan forseta í gær. Mikill pólitískur órói hefur verið í Suður-Kóreu síðustu misseri og síðasti forseti var settur af eftir að hann lýsti yfir herlögum. Hver er Lee Jae-myung, nýkjörinn forseti Suður-Kóreu? Lilja Alfreðsdóttir fer í saumana á því með okkur.
Við höldum áfram að ræða varnar- og hernaðarmál eftir fréttir þess efnis að íslensk stjórnvöld íhugi að verja um 70 milljörðum króna á ári í varnartengd útgjöld. Í upphafi viku ræddum við hvort mikil ógn sé í raun af Rússum og við ætlum í dag að ræða hvaða þjóðir, þar á meðal Rússland, hafi efnahagslega burði til að standa í miklu stríði, og hvort efnahagsleg rök mæli gegn því að stigmögnun verði í þessum málum í Evrópu. Ásgeir Brynjar Torfason, doktor í fjármálum og ritstjóri Vísbendingar, ræðir þessi mál við okkur.
Grjóthrun varð á Siglufjarðarvegi í gærkvöldi og lítið skriðuhlaup féll í Neskaupstað, í jaðri byggðarinnar. Veðurstofan hefur gefið út viðvörun vegna skriðuhættu og vatnavaxta á norðan- og austanverðu landinu. Jón Kristinn Helgason fagstjóri á sviði skriðufalla og hættumats hjá Veðurstofu Íslands fer yfir málin með okkur.
Við ætlum að ræða stöðu Framsóknarflokksins í lok þáttar en fylgi flokksins í nýjasta Þjóðarpúlsi Gallup mælist fimm og hálft prósent og hefur aldrei mælst minna frá því að Gallup hóf mælingar árið 1992. Við ræðum við Gunnar Ásgrímsson, formann Sambands ungra Framsóknarmanna, og Ingibjörgu Isaksen, formann þingflokks Framsóknar.
