Magnús Þór Jónsson, formaður Kennarasambands Íslands, verður gestur okkar í upphafi þáttar en kennaraverkföllin voru dæmd ólögmæt í gær og nemendur því á leið í skólann þennan morguninn.
Um fátt hefur verið meira rætt undanfarið en Reykjavíkurflugvöll og Ólafur Margeirsson, doktor í hagfræði og húsnæðismálasérfræðingur hjá Credit Suisse, steig inn í þá umræðu í gær og færði fyrir því rök á Facebook síðu sinni að einfaldast væri að færa innanlandsflugið til Keflavíkur og byggja nýjan spítala í Keflavík. Við förum yfir þessa hugmynd með Ólafi og útreikningana sem styðja hana.
Meirihluti borgarstjórnarinnar sprakk á föstudagskvöld þegar borgarstjóri sleit samstarfi Framsóknarflokksins við Samfylkinguna, Pírata og Viðreisn. Við ræðum stöðuna við Evu Marín Hlynsdóttur stjórnmálafræðing.
Donald Trump Bandaríkjaforseti hefur heitið því að Bandaríkjamenn fái að njóta plaströra á ný og vill binda enda á áherslu á pappírsrör sem virka ekki að hans mati. „Aftur í plast!“ skrifaði forsetinn í hástöfum á samfélagsmiðli sínum. Við ætlum að ræða þessa ákvörðun og áhrif hennar, óánægju með papparörin og stöðuna hér heima við Guðmund Steingrímsson, fyrrverandi þingmann, stjórnarmann í Landvernd og doktorsnema í umhverfis- og auðlindafræði.
Við ræðum borgarstjórnarmálin við borgarfulltrúana Alexöndru Briem, Pírötum og Ragnhildi Öldu Vilhjálmsdóttur, Sjálfstæðisflokki.
Við förum yfir íþróttir helgarinnar og gerum upp úrslitin í Super Bowl með íþróttadeildinni.
Haukur Arnþórsson, stjórnsýslufræðingur, verður gestur okkar í lok þáttar þegar við ræðum þá ákvörðun stjórnvalda að krefja stjórnmálaflokka ekki um endurgreiðslu á styrkjum úr ríkissjóði þrátt fyrir að þeir hafi ekki uppfyllt tiltekin skilyrði.
