Morgunútvarpið

Svik við ungu kynslóðina,hagyrðingar,Sigmundur Davíð,Halla Hrund og Kolbeinn boxari

Öllu verður til tjaldað á hagyrðingakvöldi í Klúbbnum í Iðnó í kvöld þegar landskunnir hagyrðingar stíga á stokk og kasta fram stökum um það sem efst er á baugi, bæði menn og málefni. Þá mun hin einstæða kvæðamannasveit Tríó Zimsen troða upp. Fátítt er að efnt sé til slíks viðburðar í Reykjavík - og er það einsdæmi á Listahátíð. Pétur Blöndal og séra Hjálmar Jónsson komu og sögðu frá þessu.

Sigurður Sigurðsson er byggingaverkfræðingur og áhugamaður um betra samfélag. Hann birti pistil á dögunum undir fyrirsögninni „Kerfislægt of­beldi og pólitísk svik við ungu kyn­slóðina - tvöföld eignaupptaka“. Þar segir hann meðal annars að sáttmála um öruggt húsaskjól hafi verið kastað á bálköst sérhagsmuna, fákeppni og pólitísks aðgerðaleysis. Stór orð og við fengum hann til okkar.

Kolbeinn Kristinsson hafði betur gegn Tékkanum Pavel Sour í svakalegum þungavigtarbardaga í Kaupmannahöfn í síðustu viku. Kolbeinn er taplaus eftir alla tuttugu bardagana sína á ferlinum og vonast til að berjast von bráðar á Íslandi. Við fengum Kolbein til okkar í spjall.

Halla Hrund Logadóttir, þingkona Framsóknarflokksins og Sigmundur Davíð Gunnlaugsson, formaður Miðflokksins, komu til okkar og fóru yfir fréttir vikunnar.