Hægari fólksfjölgun og öldrun þjóðarinnar þýða að framboð vinnuafls mun vaxa hægar á komandi árum, á sama tíma og eftirspurn eftir sérfræðikunnáttu eykst, einkum í heilbrigðis-, velferðar‑ og menntakerfinu. BHM fjallar um þessi mál á morgunverðarfundi í Norræna húsinu í dag klukkan 8.30. Þar er staðin metin þannig að ef það verður ekki gripið til markvissra aðgerða mun þrýstingur á sérfræðistéttir aukast með fyrirsjáanlegum áhrifum á gæði opinberrar þjónustu, framleiðni í hagkerfinu og jafnvægi opinberra fjármála. Ingvar Freyr Ingvarsson hagfræðingur BHM kom til okkar.
Af hverju er allir og amma þeirra byrjaðir að spila padel? Íþróttir þekktist varla á Íslandi fyrir nokkrum misserum en nú rísa heilu padel-hallirnar og iðkendafjöldinn vex ört. Kristján Hjálmarsson, Padel-unnandi, hefur spilað padel í hverri viku í rúmlega þrjú ár og þekkir menn sem spila miklu oftar. Hann kom til okkar og útskýrði æðið.
Tilraunir Dr. Gunna til að róa border collie-tíkina Skrítlu, sem var á bullandi lóðaríi um jólin, skiluðu engu. Henni tókst að lokka til sín Sexy Rúrik, border collie af næsta bæ og nágrannahundinn Spora og bar þetta óhefðbundna jólaævintýri ávöxt í vikunni þegar fimm hvolpar komu í heiminn. Morgunútvarpið er hundaþáttur og þetta er saga sem við fengum Dr. Gunna til að segja.
RÚV greindi frá því í gær að svokölluð peptíð séu vinsæl hjá ungu fólki, sem sprautar sig með þeim í von um að húðin lagist, matarlyst minnki, brúnka aukist og jafnvel að beinabygging breytist. Við höfum líka fjallað um að testósterón sé í tísku hjá körlum sem nota það til að auka vöðvamassa, minnka slen og auka kynkvöt. Menn vilja sem sagt hámarka fegurð sína, eitthvað sem kallast „looksmaxxing“ á ensku og til að ræða það við okkur fengum við til okkar rapparann og leikarann Jóhann Kristófer Stefánsson, Joey Christ.
Í lok ársins 2023 strengdi Anna Björk Björgvinsdóttir áramótaheit að fara á fullt af tónleikum. Hún hefur heldur betur staðið við það og fór á 38 tónleika í fyrra, meðal annars með Weekend, Coldplay, Jason Derulo, Post Malone, Zöru Larsson og Kylie Minogue. Hún er hvergi nærri hætt og heldur áfram að segja já við öllum tónleikum. Anna Björk kíkti til okkar í Morgunútvarpið og sagði okkur hvað hefur staðið upp úr.
