Fjölnir Sæmundsson, formaður Landssambands lögreglumanna, verður gestur minn í upphafi þáttar en ríkisstjórnin samþykkti í gær aðgerðir til að fjölga lögreglumönnum. Við ræðum þær og annað sem tengist lögreglunni í þingmálaskránni sem birt var í gær.
Mögulegt tollastríð að frumkvæði Bandaríkjanna hefur skapað ólgu og leitt til töluverða lækkana á hlutabréfamörkuðum. Ég ætla að ræða stöðuna hér heima og áhrif alþjóðamálanna við Magnús Harðarson, forstjóra Kauphallarinnar.
Og Donald Trump Bandaríkjaforseti hefur ákveðið að banna fjarvinnu hjá fjölda opinberra starfsmanna og skipað þeim að mæta aftur í staðvinnu eins fljótt og hægt er, með þeim rökum að margir muni ekki láta sjá sig og hafi jafnvel verið í annarri vinnu á sama tíma og þeir þáðu laun í fjarvinnu hjá ríkinu. Í úttekt Forbes í gær kom fram að 14 prósent starfsmanna hjá stærstu fyrirtækjum Bandaríkjanna hafi sagt upp störfum eftir að dregið var úr fjarvinnu og krafa gerð um mætingu fimm daga vikunnar. Ég ræði þessar breytingar við Adríönu Karólínu Pétursdóttur, formann Mannauðs, félags mannauðsfólks á Íslandi.
Formenn ríkisstjórnarflokkanna kynntu í gær verkefnalistann á vorþingi og þingmálaskrá. Til að rýna í þetta allt saman koma til mín Vilhjálmur Árnason, þingmaður Sjálfstæðisflokksins, og Pawel Bartoszek, þingmaður Viðreisnar.
Sævar Helgi Bragason, vísindasérfræðingur Morgunútvarpsins, ræðir við mig um fréttir úr heimi vísindanna.
Sturla Brynjólfsson, barnasálfræðingur, verður gestur minn í lok þáttar þegar við ræðum áhrif kennaraverkfallsins á þau rúmlega fimm þúsund börn sem nú sitja heima og hvernig foreldrar geta skipulagt tímann svo börnunum líði sem best.
