Halla Þorvaldsdóttir, framkvæmdastjóri Krabbameinsfélagsins, verður gestur okkar í upphafi þáttar þegar við ræðum gagnrýni á félagið og bleika daginn sem er í dag.
Við höfum töluvert rætt um stöðu íslenskunnar að undanförnu, en hvernig stendur vesturíslenskan í Norður-Ameríku? Helga Hilmisdóttir, sviðsstjóri hjá Árnastofnun, þekkir þau mál vel og ræðir við okkur um tunguna og söguna.
Við ætlum að halda áfram umræðu um tekjuskatt og leiðir til að létta undir með ungum fjölskyldum í ljósi frétta frá Póllandi þar sem tveggja barna foreldrar verða samkvæmt nýjum lögum undanþegnir tekjuskatti. Gylfi Magnússon, prófessor við viðskiptafræðideild Háskóla Íslands, ræðir þessi mál við okkur.
Við heyrum reglulega minnst á upplýsingahernað Rússa þessi misserin, ekki síst í tengslum við pólitík vestrænna landa. Hvað erum við nákvæmlega að tala um? Gunnhildur Birna Gunnarsdóttir sökkti sér í málið í meistaranámi sínu og segir okkur hverju hún varð nær fyrir vikið.
Monika Hjálmtýsdóttir, formaður Félags fasteignasala, ræðir við okkur um sérstaka stöðu á fasteignamarkaði.
Niðurstöður nýjustu mælingar Maskínu sýna að fylgi stjórnmálaflokkanna er á talsverðri hreyfingu. Við tökum púlsinn á pólitíkinni með Ólafi Þ. Harðarsyni prófessor emeritus í stjórnmálafræði.
