Á vorin og snemma á sumrin velja sumir að eitra í görðum sínum. Þetta er þó ekki endilega besta lausnin fyrir garðana og fólkið sem leikur sér í þeim. Bryndís Björk Reynisdóttir garðyrkjufræðingur ætlar að segja okkur frá fjölbreyttum aðferðum sem spyrna við skaðvöldum í garðrækt án þess að nota eitur.
Femínistar, vegan og trans fólk eru þeir hópar sem rúmlega fimmtungi ungra drengja er mest í nöp við - þetta sýna nýjar mælingar og sagt var frá þeim í pistli í Speglinum í vikunni sem vakti talsverða athygli. Við ræðum málið við Magnús Þór Jónsson formann Kennarasambands Íslands.
Donald Trump Bandaríkjaforseti kynnti í gærkvöldi fjölmarga nýja tolla á vörur sem eru fluttar inn til Bandaríkjanna. Við ætlum að rýna í tíðindi gærkvöldsins og ræða áhrifin við Ásgeir Brynjar Torfason, doktor í fjármálum og ritstjóra Vísbendingar.
Kosningum til Stúdentaráðs Háskóla Íslands lýkur í dag og við ætlum að fá til okkar fulltrúa frá þeim fylkingum sem bjóða fram til að ræða um það sem er kosið og stöðu stúdenta almennt. Júlíus Viggó Ólafsson, oddviti Vöku, og Katla Ólafsdóttir, oddviti Röskvu, koma til okkar.
Heiðar Ingi Svansson, formaður félags íslenskra bókaútgefenda, verður gestur okkar eftir fréttayfirlit hálf níu þegar við ræðum frumvarp mennta- og barnamálaráðherra um námsgögn sem rætt var á þingi í gær.
Hagvextir og saga þjóðar er sýning á Hönnunarmars sem Búi Bjarmar Aðalsteinsson stendur á bak við. Búi kíkir til okkar.
