Samkvæmt tölum frá Hagstofunni var slegið met í seldum gistinóttum á Norðurlandi í júlí og ágúst. Sumartímabilið virðist vera að lengjast og má reikna með að millilandaflug um Akureyrarflugvöll spili þar inn. Við slógum á þráðinn norður og heyrðum í Halldóri Óla Kjartanssyni verkefnastjóra hjá Markaðsstofu Norðurlands um uppgang í ferðaþjónustu og nýtt vöruþróunarverkefni, sem ber heitið Straumhvörf.
Aðeins lítill hluti forstjóra stórra fyrirtækja hér á landi eru konur. Þessu stefna forsvarsmenn Jafnvægisvogar Félags kvenna í atvinnulífinu að því að breyta. Eitt markmiða verkefnisins er að auka á jafnvægi kynja í efsta lagi stjórnunar fyrirtækja í íslensku viðskiptalífi svo að árið 2027 verði hlutfallið á milli kynja a.m.k. 40/60 í framkvæmdastjórnum fyrirtækja á Íslandi. Bryndís Reynisdóttir verkefnastjóri hjá FKA kom til okkar og fór yfir stöðuna.
Stjórnarandstaðan gagnrýndi á þingi í gær óvissuna hvað varðar efnahagsmálin og fjárlögin eftir afsögn Bjarna Benediktssonar sem fjármála- og efnahagsráðherra. Við ræddum við Kolbrúnu Halldórsdóttur, formann BHM, um stöðuna í efnahagsmálunum, afsögn ráðherra, kjaraveturinn framundan og aðhald í ríkisrekstri.
Fjöldi bíla er fastur á Hellisheiði og við slógum á þráðinn til Jóns Þórs Víglundssonar upplýsingafulltrúa Landsbjargar sem fór yfir stöðuna með okkur.
Í nýrri skýrslu Alþýðusambands Íslands um erlent launafólk og brotastarfsemi á vinnumarkaði kemur fram að 56 prósent innflytjenda segjast hafa orðið fyrir vinnumarkaðsbrotum á síðustu tólf mánuðum. Við ræddum skýrsluna, sem dregur fram tvískiptingu vinnumarkaðar hér á landi, við Karen Ósk Nielsen Björnsdóttur, lögfræðing hjá ASÍ, og Steinunni Bragadóttur, hagfræðing hjá sambandinu.
Við heyrðum svo af nýjum sjónvarpsþáttum sem bera heitið Skaginn og hefja göngu sína á RÚV á mánudaginn kemur. Hannes Halldórsson er í hlutverki framleiðanda þessara þátta og hann kíkti til okkar og sagði okkur betur frá, en þættirnir fjalla um ótrúlega sigursæla lið ÍA sem varð Íslandsmeistari karla í knattspyrnu fimm ár í röð.
Tónlist:
Myrkvi - Early warning.
Jamiroquai - Little L.
Malen og Raven - Right?
Aretha Franklin - You make me feel like a natural woman.
Housemartins - Happy hour.
Valdimar Guðm. og Memfismafían - Okkar eigin Osló.
Hall and Oates - Maneater.
Julian Civilian - Fyrirmyndarborgari.
Noah and the Whale - L.I.F.E.G.O.E.S.O.N.
Hljómar - Heyrðu mig góða.
Stebbi Jak - Líttu í kringum þig.
