Ísbjarnarhúnn var felldur í fjörunni á Höfðaströnd í Jökulfjörðum um fjögurleitið í gær. Hræ húnsins var flutt til Reykjavíkur í gærkvöldi og til stendur að rannsaka dýrið frekar. Iðlulega þegar ísbirnir rata á Íslandsstrendur vakna spurningar um það hvort virkilega sé nauðsynlegt að aflífa dýrin. Við hefjum þáttinn á smá ísbjarnaspjalli við Sigrúnu Ágústsdóttur, forstjóra Umhverfisstofnunar.
Mikil umræða hefur verið undanfarna daga um að íslenskt samfélag þurfi á einhvers konar naflaskoðun að halda, að við höfum jafnvel farið út af sporinu. Samtímis og við ræðum nauðsyn þess að halda þéttar utan um börn var barist fyrir því að langveikt barn fengi að dvelja hér. Er til eitthvað sem heitir siðferðiskennd þjóðar? Við ræðum við siðfræðinginn Henrý Alexander Henrýsson.
Morgunblaðið greindi frá því í gær að dómsmálaráðherra segi sjálfsagt að skoða að semja við önnur ríki um að hýsa fanga með erlendan ríkisborgararétt. Yfirfull fangelsi hafa leitt til þess að önnur ríki hafa skoðað að fara þessa leið, sem við ætlum að ræða við Margréti Valdimarsdóttur, dósent í afbrotafræði við Háskóla Íslands.
Spænski miðjumaðurinn Rodri, leikmaður Manchester City, hefur greint frá því að leikmenn í bestu deildum heims íhugi nú verkfallsaðgerðir vegna fjölgunar leikja og aukins álags. Við ræðum mögulegt verkfall knattspyrnumanna við Jóhann Má Helgason, sérfræðing í fjármálum knattspyrnufélaga.
Venju samkvæmt förum við síðan yfir fréttir vikunnar, í þetta skiptið með fjölmiðlafólkinu Sindra Sindrasyni og Kristínu Ólafsdóttur.
Tónlist:
Bubbi Morthens - Ísbjarnarblús.
INSPECTOR SPACETIME & UNNSTEINN - Kysstu mig (feat. Unnsteinn).
Una Torfadóttir - Fyrrverandi.
BJÖRG PÉ - Timabært.
Birnir - Spurningar (ft. Páll Óskar).
Carpenter, Sabrina - Please Please Please.
OASIS - Don't Look Back In Anger.
