Aðalfundur ADHD samtakanna skorar á Heilbrigðisráðherra að grípa nú þegar til aðgerða vegna þess kerfishruns sem blasir við í þjónustu hins opinbera við fólk með ADHD. Vegna aðgerðarleysis stjórnvalda á liðnum árum hafa biðlistar eftir greiningu og meðferð meira en tvöfaldast og nú bíða um fjögur þúsund einstaklingar eftir að komast í greiningarferli. Biðtími fullorðinna eftir ADHD greiningu og meðferð verður að óbreyttu vel á annan áratug hjá þeim sem nú hefja ferlið samkvæmt tilvísun Heilsugæslulæknis. Þetta segir í ályktun aðalfundar ADHD samtakanna. Við fengum Vilhjálm Hjálmarsson, formaður samtaka til okkar.
Hvað er réttast að gera þegar vísindamaður greinir heilbrigða manneskju með gen sem gæti valdið sjúkdómi en mun líklegast ekki gera það? Þetta og fleira verður til umræðu á málþingi Vísindasiðanefndar á föstudag. Þorvarður Löve, formaður VSN, verður þar fundarstjóri og mætti til okkar í spjall.
Skýrsla Hilary Cass, fyrrum forseta félags barnalækninga á Bretlandi, sem kom út á dögunum og var unnin að ósk breskra heilbrigðisyfirvalda -hefur verið talsvert til umræðu. Skýrslan tekur fyrir þjónustu við börn og ungmenni með kynama/kynmisræmi. Við ræddum málið við Bjarndísi Helgu Tómasdóttur formann Samtakanna 78.
Í fyrrasumar skipaði Umhverfis-, orku- og loftslagsráðherra starfshóp til að vinna tillögur um aðgerðir sem stuðlað geta að því að efla samfélagið á Langanesi. Áttu tillögurnar m.a. að snúa að friðlýsingu á hluta Langaness, t.d. með stofnun þjóðgarðs, eflingu hringrásarhagkerfisins og grænni atvinnuuppbyggingu á svæðinu. Jafnframt verði hugað að bættu orkuöryggi svæðisins. Njáll Trausti Friðbertson, þingmaður Sjálfsstæðisflokksins í Norðausturkjördæmi, var formaður starfshópsins. Hann kom til okkar.
Boðað hefur verið til mótmæla á Austurvelli seinnipartinn í dag, þar sem vinnubrögðum Fasteignafélagsins Þórkötlu verður mótmælt. Borið hefur á mikilli óánægju meðal Grindvíkinga, sem vilja fá eignir sínar keyptar upp sem fyrst. Grindvíkingurinn Sverrir Árnason skipuleggur mótmælin og við heyrðum í honum.
Dagur verkfræðinnar fer fram á morgun föstudag á Hilton Reykjavík Nordica. Fjöldi erinda er á dagskrá. Eitt þeirra ber heitið Úrgangi breytt í orku og okkur fýsti að vita meira um það. Niðurstöður nýrrar skýrslu sýna að hagkvæmara er að reisa brennslustöð fyrir úrgang hér á landi en að flytja hann út til brennslu erlendis. Til að segja okkur nánar frá þessu og frá Degi verkfræðinnar kom til okkar Árni B. Björnsson framkvæmdarstjóri verkfræðingafélagsins.
Við hringdum í Ingu Sæland og fengum viðbrögð hennar við atkvæðagreiðslunni í gærkvöldi um vantrauststillögu Flokks fólksins og Pírata.
Lagalisti:
Björg Pé - Reiknaðu með mér
Kate Bush - Running Up That Hill
Depeche Mode - Enjoy The Silence
Bubbi Morthens - Skríða
America - A Horse With No Name
