Eftir margra mánaða ládeyðu á fasteignamarkaði fóru hjólin aftur að snúast upp úr áramótum, íbúðir farnar að seljast á yfirverði og húsnæðisliðurinn er helsta ástæðan fyrir því að verðbólga hækkar milli mánaða. Hvað gerðist og hvert verður framhaldið? Við spáum í húsnæðismál í kvöld.

Tugir ábendinga um mansal eða misneytingu hafa borist ASÍ og öðrum stéttarfélögum síðustu vikur í kjölfar aðgerða lögreglu gegn viðskiptaveldi Víetnamans Quangs Lés í byrjun mánaðarins. Fjórum ábendingum hefur verið vísað til lögreglu. Ein þeirra er nú til skoðunar og tengist snyrtistofum. Urður Örlygsdóttir ræddi við fyrrverandi formann Félags íslenskra snyrtifræðinga í dag, sem segir lítið sem ekkert eftirlit með greininni.

Fá áttu von á að kántrítónlist tæki yfir vinsældalista og hífðu hlustunartölur upp í hæstu hæðir en það er engu að síður raunin. Hver tónlistarmaðurinn á fætur öðrum hefur svissað yfir í sveitatónlistina. Kastljós tók punktstöðuna í tónlist með Önnu Dungal tónlistarfræðingi.