Fyrr í sumar rákumst við fyrir tilviljun á íslenskt Orðanet sem hægt er að finna undir netsíðu Árnastofnunar. Þá vorum við að tala um veður, einu sinni sem oftar, og sáum á samfélagsmiðlum þar sem slegið hafði verið inn á síðu orðanetsins hugtakið blíðviðri og þá birtist afskaplega skemmtileg flétta orða sem tengjast, eru skyldheiti, grannheiti og svo framleiðis. Þetta er sett fram á afar fallegan hátt, sem einskonar blóm og svo er einnig hægt að skoða ýmsan frekari fróðleik um orðið sem slegið er inn. Jón Hilmar Jónsson, prófessor emeritus, er höfundur Orðanetsins og hann kom í þáttinn í dag og sagði okkur betur frá því, tilurð þess og áhugaverðum leiðum til að nota Orðanetið.
Ása Baldursdóttir kom svo til okkar í dag eins og alla miðvikudaga í sumar og hélt áfram að segja okkur frá áhugaverðu efni til að hlusta á og horfa á. Í dag fjallaði Ása um hlaðvarpið Forfeður okkar voru ruglaðir, eða Our Ancestors Were Messy, þar sem saga svartra bandaríkjamanna er reifuð úr fjölmiðlum þeirra tíma. Svo sagði hún frá hlaðvarpinu Hverju eyðum við, eða What We Spend, þar sem raunverulegt fólk opnar bókhald sitt upp á gátt og að lokum talaði hún um sjónvarpsþættina Æfinguna (The Rehearsal) sem hafa vakið gríðarlega mikla athygli undanfarið.
Fugl dagsins var svo auðvitað á sínum stað.
Tónlist í þættinum í dag:
Í útilegu / Þú og ég (Gunnar Þórðarson, texti Þorsteinn Eggertsson)
Sumargestur / Ásgeir Trausti (Ásgeir Trausti Einarsson, texti Einar Georg Einarsson)
Með allt á hreinu / Stuðmenn (Sigurður Bjóla Garðarsson, texti, Egill Ólafsson og Valgeir Guðjónsson)
Quando Quando / Páll Óskar og Milljónamæringarnir (Renis, Boone & Testa)
UMSJÓN: GUNNAR HANSSON
