Við heyrðum í þættinum í dag af tveimur söfnunarátökum til styrktar Píeta samtökunum, annars vegar er það Bergur Vilhjálmsson, slökkviliðs- og sjúkraflutningamaður, en hann mun klára á morgun göngu sína frá Goðafossi til Reykjavíkur með 100 kílóa kerru í eftirdragi sem ber allan hans búnað. Og svo er það Sigurgeir Svanbergsson sem hyggur á að spreyta sig við Ermasundið líklegast á morgun. Við heyrðum í honum frá þar sem hann var staddur í Dover og bíður eftir græna ljósinu að leggja af stað. Ellen Calmon framkvæmdastýra Píeta samtakanna var svo hjá okkur í Efstaleitinu og sagði okkur betur frá þessum söfnunum og samtökunum.
Hinrik Wöhler sendir okkur á fimmtudögum í sumar það sem við köllum Bæjarperlur. Í þetta sinn fór hann út í Viðey og ræddi við Baldvin Má Baldvinsson, sagnfræðing og umsjónarmann Viðeyjar í sumar. Við heyrðum þeirra spjall þar sem þeir töluðu til dæmis um uppbyggingu og hlutverk Viðeyjarstofu, sögu og hönnun kirkjunnar og þjóðsögur tengdar henni og svo hversdagslífið, ferðamennskuna, fuglalífið og matjurtargarðinn sem leynist á bak við Viðeyjarstofu.
Fugl dagsins var svo auðvitað á sínum stað.
Tónlist í þættinum í dag:
Tasko Tostada / Hljómar (Rúnar Júlíusson)
Raindrops Keep Falling On My Head / Perry Como (Burt Bacharach, texti Hal David)
Chain of Fools / Aretha Franklin (Don Covay)
Á plánetunni jörð / Nýdönsk (Björn Jörundur Friðbjörnsson)
UMSJÓN: GUNNAR HANSSON OG HULDA GEIRSDÓTTIR
