Í dag heyrðum við í hjónunum Maríu Björk Guðmundsdóttur og Gunnari Eyfjörð Ómarssyni, en þau segja að þau hafi verið tiltölulega eðlileg fjölskylda á Akureyri fyrir fjórtán árum, með þrjú börn og tvo ketti, þegar þau ákváðu að fá sér hvolp. Fjórtán árum síðar eiga þau 28 hunda, og það enga smáhunda, heldur 28 husky sleðahunda og reka tvö fyrirtæki tengd hundunum þar sem þau meðal annars bjóða upp á sleðaferðir, hundaknús og eru jafnvel farin að vinna ull úr feldi hundanna. Við fengum þau til að segja okkur allt um þetta í þættinum í dag.
Ása Baldursdóttir kom í síðasta sinn til okkar í dag til að segja frá áhugaverðu efni til að hlusta á og horfa á, hlaðvörp og sjónvarpsþáttaraðir. Í dag fjallaði Ása um hlaðvarp um netglæpi á heimsvísu þar sem stórfelld fjársvik eiga sér stað, hlaðvarp um sjálfshjálparhreyfingu sem ekki er öll þar sem hún er séð og sagði að lokum frá hjartahlýrri sjónvarpsþáttaröð um Inúíta í norðri.
Fugl dagsins var svo auðvitað á sínum stað.
Tónlist í þættinum í dag:
Sumarvísa / Þorgerður Ása Aðalsteinsdóttir og Vigdís Hafliðadóttir (Mats Paulson, texti Iðunn Steinsdóttir)
Vegurinn heim / Marketa Irglová (Magnús Eiríksson)
Fram í heiðanna ró / GÓSS (Daniel E. Kelley, texti Friðrik Aðalsteinn Friðriksson)
Aftur heim til þín / Eyþór Ingi og Lay Low (Baldur Hjörleifsson og Nina Richter)
UMSJÓN: GUNNAR HANSSON OG ARNHILDUR HÁLFDÁNARDÓTTIR
