Kastljós

Frumkvöðlar og nýsköpun

Nýsköpun setur sterk svip á bæjarbraginn þessa vikuna, Hönnunarmars hófst í gær og stór alþjóðleg ráðstefna um nýsköpun er haldin í Vísindagörðum í dag og á morgun. Nýsköpun er enda í örum vexti og þvert á atvinnugreinar, hvort sem það er lyfjadreifing, moltugerð eða rafrænar undirskriftir svo dæmi séu nefnd. En hvernig er hlúð að frumkvöðlum hér á landi, á hvað horfa fjárfestar áður en þeir ákveða að setja stórfé í fyrirtæki sem eiga eftir að sanna sig og hvað vilja stjórnvöld að gera til að bæta umhverfi nýsköpunar og hámarka hávinning þeirra?

Kastljós fór í heimsókn til þriggja nýsköpunarfyrirtækja; PLAIO, sem býður upp á tæknilausnir við lyfjadreifingu; Meltu, sem gerir flokkun lífræns úrgangs auðveldari fyrir heimili og hagkvæmari fyrir sveitarfélög; og Taktikal, sem sém sérhæfir sig í lausnum fyrir stafrænar undirskriftir.

Öll þessi fyrirtæki eiga sameiginlegt að hafa farið í gegnum viðskiptahraðla hjá Klak, sem hjálpar frumkvöðlum að fóta sig og komast í sambönd við fjárfesta og viðskiptavini. Ásta Sóllilja Guðmundsdóttir, framkvæmdastjóri Klak var gestur þáttarins, sem og Sigurður Arnljótsson, fjárfestingarstjóri Brunns Venture, vísisjóðs sem fjárfestir í nýsköpun.

Svo er það nýsköpunarumhverfið og ramminn sem stjórnvöld móta. Áslaug Arna Sigurbjörnsdóttir, háskóla- iðnaðar- og nýsköpunarráðherra fer yfir áskoranir í málaflokknum og hverju hún vill breyta.