Stofnfundur nýrra samtaka "Björgum Kristnesspítala" fór fram á sunnudaginn en tilgangurinn er að berjast fyrir áframhaldandi starfsemi endurhæfingar á spítalanum. Uppi eru áform um að leggja niður endurhæfingarþjónustuna, sem hafa vakið áhyggjur og óánægju meðal fólks á svæðinu. Samtökin vilja að allir möguleikar verði kannaðir áður en ákvörðun er tekin, meðal annars með endurbótum á núverandi húsnæði eða byggingu nýs húsnæðis. Þau leggja áherslu á mikilvægi Kristnesspítala fyrir heilbrigðisþjónustu á Norðurlandi og vilja tryggja að starfsemin eigi sér framtíð á staðnum. María Pálsdóttir veit allt um málið og hún var á línunni.
Í skoðanagrein á Vísi "Hvað verður um störfin okkar?", sem Auður Alfa Ólafsdóttir sérfræðingur í umhverfis- og neytendamálum skrifar, er fjallað um hvernig gervigreind, sjálfvirknivæðing og loftslagsbreytingar munu hafa áhrif á íslenskan vinnumarkað og framtíð starfa. Áhrifin geta orðið mismunandi eftir starfsstéttum og samfélagshópum. Fólk á landsbyggðinni geti t.d. átt erfiðara með að finna nýja vinnu ef störfum fækkar í heimabyggð. En þarna eru líka tækifæri segir Auður Alfa og kallar eftir að launafólk fái að taka virkan þátt í að móta framtíð sína og atvinnulífsins. Auður Alfa kom til okkar.
Huppa á Kluftum, ættmóðir íslenska kúastofnsins, fæddist fyrir hundrað árum í dag. Hún þótti strax bera af öðrum kúm hvað mjólkurlagni varðaði en árið 1936 mjólkaði hún 5.390 lítra, sem þótti ótrúlegt á þeim tíma. Það var Huppu að þakka að Hrunamenn urðu leiðandi í kúabúskapnum, en kýrin er talin sérstakur gripur á heimsvísu. Til að segja okkur betur frá þessari mögnuðu kú var á línunni Helgi Valdimar Sigurðsson, formaður Nautgriparæktarfélags Hrunamanna.
Búið er að loka fyrir rafmagn og vatn í hjólhýsabyggðinni á Sævarhöfða í Reykjavík. Þingmenn Flokks fólksins lögðu í dag fram tillögu um varanlega búsetu í færanlegum búsetueiningum. Bergþóra Pálsdóttir talskona íbúanna segir þau upplifa að þau megi hvergi vera. Hún kíkti til okkar.
Og í dag hringdum við til Spánar og heyrðum í Jóhanni Hlíðar Harðarsyni sem að þessu sinni ætlar að segja okkur af hvernig niðurskurður síðusta ára á viðhaldi lestarkerfisins hefur aukið slysahættu og svo segir hann okkur af Nóbelsverðlaunum fyrir gersamlega tilgangslausar rannsóknir. Spánarspjallið er í seinni hluta þáttarins.
Leikstjórinn Inga Bjarnason heillaðist snemma af leiklistinni og leitaði víða inngöngu í heim leikhússins. Í nýrri sjálfsævisögu sem nefnist Einfætta ballerínan lýsir hún baráttu sinni við lesblindu og athyglisbrest á langri ævi og kveikir líf í minningum um samferðafólk liðinnar tíðar. Á morgun verður haldið útgáfuhóf bókarinnar en Inga kíkti til okkar og sagði frá.
Hólmfríður María Ragnhildardóttir, Rúnar Róbertsson og Júlía Margrét Einarsdóttir halda landanum vel upplýstum um menn og málefni á leið úr vinnu. Þau fylgjast með fréttum og dægurmálum og spila nóg af góðri tónlist.
