Þau Guðrún Dís Emilsdóttir, Hrafnhildur Halldórsdóttir og Þórður Helgi Þórðarson halda landanum vel upplýstum um menn og málefni á leið úr vinnu. Þau fylgjast vel með fréttum og dægurmálum og spila nóg af góðri tónlist.
Í Háskóla Íslands eru rúmlega sjöhundruð erlendir nemendur í íslensku sem öðru máli. Þetta þykir okkur mjög áhugavert og leikur forvitni á að vita meira. Brynja Þorgeirsdóttir lektor í íslenskum bókmenntum veit allt um málið og hún kom til okkar.
Allt leikur á reiðiskjálfi í herbúðum fegurðasamkeppninnar Ungfrú alheimur sem fram fer í Thailandi. Draminn í kringum keppnina hefur ekki dulist þeim sem fylgjast náið með fegurðasamkeppnum en við hér heima höfum ekki fengið mikið veður af þessu. Magnús Jochum Pálsson blaðamaður á vísi skrifaði góða grein um málið í dag og hann var á línunni hjá okkur.
Jólabjórinn kemur í dag já jólabjórinn kemur í dag og í ár verða 90 tegundir jólabjórs til sölu í Vínbúðunum, ef allar vörur skila sér frá framleiðendum í hillur verslana. Bjóráhugamennirnir og bjórbræðurnir Sveinn Waage og Stefán Pálsson rýndu í sendinguna.
Grettir Einarsson er grínisti og leikari hefur verið búsettur í Noregi síðustu 15 ár. Grettir er á leið til Íslands með sýninguna sína Grettirs danska bingó sem hefur verið vinsæl í Noregi og þá sérstaklega í Osló. Grettir kom til okkar nýlentur og sagði okkur frá sýningunni auk þess sem við spurðum hann um búsetuna í Noregi.
Jón Þór Víglundsson upplýsingafulltrúi Landsbjargar kom til okkar í þáttinn. Og tilefnið er auðvitað sala neyðarkallsins sem hófst í gærmorgun.
Allir með leikarnir verða haldnir í Laugardalshöll á laugardaginn. Leikarnir eru ætlaðir fyrir börn með fatlanir á grunnskólaaldri. Markmið þeirra er að kynna íþróttir fyrir börnum með fatlanir á þessum aldri og gera íþróttirnar og verkefnið sýnilegra í samfélaginu. Valdimar Gunnarsson, verkefnastjóra Allir með hjá Íþróttasambandi fatlaðra kom til okkar og við ræddum íþróttaiðkun fatlaðra barna.
