Útvarpsfréttir.
Stjórnvöld þurfa að grípa til beinskeyttra aðgerða sem fyrst til að kísilver PCC á Húsavík geti hafið starfsemi að nýju, segir í ályktun frá ASÍ.
Innri endurskoðun Reykjavíkurborgar gerir tólf tillögur til úrbóta í nýrri skýrslu um lóðasamninga við olíufélögin. Skýrslan er 105 síður og í henni eru margar athugasemdir.
Bandaríkjastjórn telur að Hamas virði vopnahléssamkomulagið við Ísrael og skili öllum látnum gíslum Fjölskyldur gíslanna segja forsendurnar brostnar.
Sest verður að Hringborði Norðurslóða í dag og setið næstu þrjá daga. Á þriðja þúsund sækja þingið, þar á meðal þjóðarleiðtogar og fulltrúar loftslagssamtaka og frumbyggja á Norðurslóðum.
Sjúkratryggingar Íslands og Ljósið, endurhæfingarmiðstöð fyrir krabbameinsgreinda, hafa samið um fjármögnun fyrir árið í ár.
Flugumferðarstjórar vona að ekki komi til verkfalls í kjaradeilu við Samtök atvinnulífsins. Fundur var hjá Ríkissáttasemjara í morgun.
Stjórnvöld skoða samstarf við einkaaðila til að fjármagna flugstöð á Reykjavíkurflugvelli. Innviðaráðherra segir að flugstöðin, sem verður áttatíu ára á næsta ári, sé ekki boðleg.
Vegagerðin telur að hægt verði að ráðast í útboð um Sundabraut snemma á næsta ári; erfitt sé að útiloka alla óvissu um umhverfisáhrif.
Kvennalandsliðið tapaði í gærkvöld fyrir Færeyingum í fyrsta leik sínum í undankeppni EM í handbolta.
