Kastljós

Óleyfisgisting í Grindavík, matarkvíði og hjálparkokkur jólasveinsins

Grindvíkingar eru sumir hverjir ósáttir við að vera neyddir til að yfirgefa heimili sín klukkan níu á kvöldin og skilja ekki hvers vegna rýmingu að næturlagi hafi ekki verið aflétt nú þegar jarðhræringar eru að miklu leyti gengnar niður. Nýtt hættumat er væntanlegt á miðvikudag og hefur lögreglustjóri gefið það út að breytist það lítið skoði hann að aflétta rýmingu að nóttu til. Við heimsóttum Grindavík í þætti dagsins.

Jólahald okkar flestra einkennist ekki síst af því að gera vel við sig í mat og drykk. Veisluborðin svigna undan kræsingum og hvert jólaboðið rekur annað og þess á milli er nartað í sætindi og afganga, ósjaldan í óhófi með tilheyrandi vanlíðan, jafnt líkamlegri sem andlegri og mörg upplifa hreinlega kvíða í tengslum við mat um jólin. Við ræddum við Röggu Nagla heilsusálfræðing um hvernig ráða megi bug á matarkvíða og gæta sér hófs.

Hjálparkokkar Jólasveinsins er félag sem hjálpar foreldrum barna sem hafa lítið milli handanna að uppfylla jólaóskir þeirra. Hjálparbeiðnirnar í ár eru orðnar á þriðja hundrað. VIð kíktum til stofnanda félagsins.