Morgunútvarpið vekur hlustendur með glóðvolgum fréttum og snarpri umfjöllun um samfélagsmál. Umsjónarmenn eru Guðrún Dís Emilsdóttir og Atli Fannar Bjarkason.
Ísland mætir Króatíu á Em í handbolta klukkan 14.30 í dag. Við hringdum til Svíþjóðar í Jón Halldórsson, formanns HSÍ, og tókum stöðuna á honum og liðinu á leikdegi.
Það er risastór helgi framundan og auðvitað merkisdagur í dag. Sparkspekingurinn Hjörvar Hafliðason hefur talið niður í bóndadaginn síðustu vikur í hlaðvarpi sínu Dr. Football og í sjónvarpsþættinum Doc Zone. Nú er bóndadagurinn loksins runninn upp og þá lág beinast við að fá Hjörvar í heimsókn til að fræða okkur um hvernig fólk gleður bændurna sína í dag.
Er eitthvað meira viðeigandi á bóndadaginn en íslenskar rímur ? Okkar helsti sérfræðingur um þær, dr. Katelin Marit Parsons, kom til okkar ásamt kvæðamanninum Þorsteini Björnssyni sem er doktorsnemi við Háskóla Íslands en hann gerði sér lítið fyrir og fór að kveða rímur í beinni en fyrir utan að kveða rímur stýrir hann kvæðalagaæfingum á vegum Kvæðamannafélags Iðunnar.
Það var nóg um að vera í vikunni og við fengum til okkar pólitísku reynsluboltana Sigríði Andersen og Brynjar Níelsson til að fara yfir fréttir vikunnar.
