Lifandi og fjölbreyttur þáttur um fréttir, menningu og dægurmál. Helstu fréttir dagsins eru krufðar og ljósi varpað á litríkt mannlíf um land allt. Umsjón: Baldvin Þór Bergsson, Bergsteinn Sigurðsson, Guðrún Sóley Gestsdóttir, Óðinn Svan Óðinsson, Urður Örlygsdóttir og Viktoría Hermannsdóttir.
Innflytjendur á Íslandi voru hátt í 70 þúsund um síðustu áramót, eða rúm 18 prósent landsmanna. Atvinnuþátttaka þeirra er hvergi meiri innan OECD en á Íslandi en á hinn bóginn er hvergi ólíklegra að innflytjendur tali heimamálið en hér. Hvað veldur? Er íslenska of erfitt tungumál? Eru tækifærin af of skornum skammti? Eða er of auðvelt fyrir fólk að komast af án þess að kunna tungumálið? Við ræðum málið við þau Aleksöndru Leónardsdóttur, sérfræðing í fræðslu og inngildingu hjá ASÍ, og Roberto Luigi Pagani, aðjúnkt í íslensku fyrir erlenda nemendur hjá Háskóla Íslands.
Sveitastjórnarkosningar eru í vor. Grindavíkingar ganga að kjörborðinu við fordæmalausar aðstæður eftir að bærinn var rýmdur fyrir tveimur árum. Á dögunum kynnti Grindavíkurnefnd tillögur um hvernig hátta megi kosningum, t.d. að allir sem bjuggu í Grindavík fyrir rýmingu geti valið hvort þau kjósi í Grindavík eða sveitarfélaginu sem þau búa nú í. Við kynntum okkur tillögurnar.
