Könglar og kertaljós

Sortirnar 17

Íslendingar hafa alltaf verið duglegir að baka fyrir jólin. Við landnám voru steinhellur notaðar til að baka brauð, á 19. öld voru jólalummur úr bankabyggi, vöfflur, pönnukökur, kleinur og laufabrauð aðalhátíðabrauðið. Með tilkomu bakarofnanna í lok 19. aldar breyttist kökumenningin og í staðinn fyrir steiktar kökur komu bakaðar. En það er ekki aðeins sætabrauðið sem heillar. Mörgum finnst heimagerður ís og möndlugrautur ómissandi um jólin og konfektgerð hefur verið að sækja í sig veðrið á síðastliðnum tveimur áratugum. Í öðrum þætti Köngla og kertaljósa skoðum við sögu smákökunnar og fáum góð ráð í konfekt- og eftirréttagerð. Rætt verður við fornleifafræðing, sagnfræðing, súkkulaðimeistara og matgæðing.

Frumflutt

4. des. 2011

Aðgengilegt til

Rennur ekki út

Síðan hvenær varð það kappsmál að baka 17 sortir fyrir jólin og gera eftirmynd af alþingishúsinu úr piparkökudeigi án þess að blikna? Hvernig á að velja jólatré og hvernig á að koma í veg fyrir að að allt barrið falli af ? Má frysta frómas? Af hverju heitir hamborgarhryggurinn þessu nafni og hvernig á að búa til gljáa á hann?

Aðventuþættirnir Könglar og kertaljós færa okkur aðeins nær jólunum og taka þátt í undirbúningnum með okkur. Saga jólahátíðarinnar verður skoðuð sem og saga nokkurra vel valinna muna sem tengja okkur svo sterkt við hátíðarnar eins og aðventukransinn, aðventuljósið og jólatréð og svo mætti áfram telja. Í þættinum verða líka ýmsir sérfræðingar teknir tali hvort sem þeir fást við blómaskreytingar, fornleifafræði, súkkulaðigerð, skógrækt, gullsmíði, sagnfræði eða kennslu í hússtjórn. Þeir munu leiða okkur í sannleikann um sögu smákökunnar, ísgerð, hvernig eigi að matreiða rauðkál og margt fleira.

Umsjón hefur Gerður Jónsdóttir.