Svik og prettir í bókmenntaheiminum

Þáttur 2 af 4

Í öðrum þætti verður fjallað um bókina The Hand that Signed the Paper sem kom út í Ástralíu árið 1994. Hún var gefin út af Helen Demidenko og þótt hún væri skáldsaga var sterklega gefið til kynna að hún byggi á reynslu höfundar sem barns úkraínskra innflytjenda. Bókin hlaut virt verðlaun og höfundurinn kom víða fram sem fulltrúi þeirra sem eru af úkraínsku bergi brotnir. Síðar kom í ljós að höfundurinn hét í raun Helen Darville og var af enskum ættum. Út af þessu varð mikið fjaðrafok en sagan af Helen Demidenko/Darville vekur upp áhugaverðar spurningar um mikilvægi höfundarins.

Frumflutt

14. mars 2025

Aðgengilegt til

Rennur ekki út

Falsanir og svikahrappar eru ekki einungis vinsælt viðfangsefni bókmennta heldur lita svik og prettir einnig útgáfusögu bókmennta. Alltaf koma við og við upp hneyksli þar sem höfundar verka verða uppvísir að því að hafa villt á sér heimildir. Slík mál vekja oft upp athyglisverðar spurningar um skáldskap og hlutverk höfunda.

Falsanir spretta upp af ákveðnu sögulegu samhengi og því skiptir forsaga þeirra miklu máli. Falsarar nýta sér þær hefðir sem fyrir eru og spila inn á væntingar viðtakenda. Líkt og satíran varpa falsanir því ljósi á einkenni einstakra bókmenntagreina og tímabila í bókmenntasögunni. Í þáttunum verða raktar frásagnir af nokkrum fölsunum í bókmenntaheiminum, litið á sögulegt samhengi og því velt upp hvort þessar falsanir segi okkur eitthvað um bókmenntir síns tíma. Lesari í þættinum: Vigdís Másdóttir

Umsjón: Auður Aðalsteinsdóttir´

(2012)