Gullöld revíunnar (2008-2009)

2. þáttur. Tóta litla fer á Báruballið

Í þessum þætti verður fjallað um revíur á árunum 1922 til 1925: Boltinn með lausa naflanum, Spánskar nætur, Góður gestur og Haustrigningar, en í „Spönskum nóttum" þreytti revíuleikarinn Haraldur Á. Sigurðsson frumraun sína. Þetta tímabil hefur stundum verið kallað fyrra blómaskeiðið í íslenskri revíusögu, en einkum urðu „Spánskar nætur" og „Haustrigningar" vinsælar, og í þættinum verða leikin og sungin atriði úr þeim. Í þeim voru líka söngvar sem brátt urðu alþekktir: „Báruballið" og „Tóta litla tindilfætt". Þórarinn Guðmundsson samdi líka lag fyrir „Spánskar nætur" sem varðveist hefur fyrir hreina tilviljun, og Emil Thoroddsen samdi lag fyrir „Haustrigningar”.

Frumflutt

11. jan. 2024

Aðgengilegt til

Rennur ekki út

Í þessari þáttaröð er fjallað um íslenskar revíur og revíusöngva allt frá 19. öld til 1960, en innan þessa tímabils urðu hér til vinsælar revíur svo sem „Fornar dyggðir", „Hver maður sinn skammt", „Nú er það svart, maður" og „Allt í lagi, lagsi", og margir söngvarnir úr þeim eru alþekktir: „Er Stebbi litli fæddist", „Það er nú flott, okkar lögreglulið", „Það er draumur að vera með dáta" og „Kalli á Hóli". Mikil áhersla verður lögð á tónlistina, en þó að margir revíusöngvar væru samdir við erlend lög sömdu íslensk tónskáld einnig revíulög. Til eru revíulög eftir Árna Thorsteinson, Þórarin Guðmundsson, Emil Thoroddsen, Oddgeir Kristjánsson, Bjarna Böðvarsson og Árna Björnsson, svo einhverjir séu nefndir, og hafa verið gerðar nýjar hljóðritanir af sumum þessara laga fyrir þáttaröðina, flestar með Erni Árnasyni og Soffíu Karlsdóttur, en Jónas Þórir leikur á píanó. Einnig verða fluttar gamlar hljóðritanir með revíustjörnum gulláranna, svo sem Alfreð Andréssyni, Haraldi Á. Sigurðssyni, Brynjólfi Jóhannessyni, Lárusi Ingólfssyni, Nínu Sveinsdóttur og Soffíu Karlsdóttur. Lesarar í þáttaröðinni eru Kjartan Guðjónsson, Helga Braga Jónsdóttir og Viðar Eggertsson, en umsjónarmaður Una Margrét Jónsdóttir.